VI Dúnıejúzilik kóshpendiler oıyndary: Kyrchynda «Kóshpendiler álemi» etnoqalashyǵy ashyldy
ASTANA.KAZINFORM - VI Dúnıejúzilik kóshpendiler oıyndarynyń negizgi mádenı orny Qyrǵyzstannyń Ystyqkól oblysyndaǵy Kyrchyn shatqalynda ashyldy, dep habarlaıdy agenttiktiń Bishkektegi tilshisi.
Búgin Kyrchynda «Kóshpendiler álemi» etnoqalashyǵynyń resmı ashylýy ótti.
Bul aýqymdy etnoqalashyqta 50 kıiz úı ornalasqan. Onda Qyrǵyzstan aımaqtary men ártúrli etnomádenı baǵyttaǵy ortalyqtar bar. Aýmaq kúnine 100 myń kelýshini qabyldaı alady.
Keshende etnobazar - kilemder, kıiz buıymdary, dástúrli kıimder, bas kıimder, sómkeler, aksessýarlar jáne qoldan jasalǵan sývenırler satyp alýǵa bolatyn úlken qolóner jármeńkesi bar. Dúkenderde dástúrli oıý-órnektermen jáne toqyma buıymdarymen bezendirilgen stıldendirilgen saman úıler ornalasqan.
Qolóner dúkenderiniń janynda ulttyq taǵamdar aımaǵy ornalasqan, onda Qyrǵyzstannyń jeti aımaǵynyń aspazdary, sondaı-aq halyqaralyq delegatsııalar úlken qazandarda ashyq aspan astynda, kelýshilerdiń aldynda shynaıy kóshpendi taǵamdaryn daıyndaıdy.
Uıymdastyrýshylardyń aıtýynsha, Dúnıejúzilik kóshpendiler oıyndarynan keıin «Kóshpendiler álemi» mádenı jáne halyqaralyq is-sharalardyń turaqty ornyna aınalýy josparlanǵan, onda qonaqtar kóshpendiler mádenıetiniń tarıhymen, dástúrlerimen tanysa alady.
Aıta keteıik, Bishkekte VI Dúnıejúzilik kóshpendiler oıyndarynyń ashylý saltanaty bastaldy.
Sondaı-aq, Qazaqstannan 150-den astam sportshy VI Dúnıejúzilik kóshpendiler oıyndaryna qatysyp jatyr.
Qazaqstan quramasy VI Dúnıejúzilik kóshpendiler oıyndarynda eki altyn medal jeńip aldy.
