VI Dúnıejúzilik kóshpendiler oıyndary elshisiniń esimi belgili boldy

ASTANA. KAZINFORM — Qyrǵyzstandyq sportshy Aısýlýý Tynybekova VI Dúnıejúzilik kóshpendiler oıyndarynyń ambassadory (elshisi) atandy, dep habarlaıdy Kabar.

Atalǵan shara 2026 jyldyń qyrkúıegine josparlanǵan. Oıyndardyń ashylý saltanaty Bishkektegi jańa «Azattyq Arena» stadıonynda ótedi.

VI Dúnıejúzilik kóshpendiler oıyndarynyń maqsaty — kóshpendi halyqtardyń dástúri men mádenıetin keńinen nasıhattaý, sondaı-aq mádenıet pen sport salasyndaǵy halyqaralyq yntymaqtastyqty nyǵaıtý.

Bul oıyndar dástúrli túrde jahandyq qoǵamdastyqtyń nazaryn aýdaryp, týrızmdi damytýǵa, tájirıbe almasýǵa jáne halyqtar arasyndaǵy dıalogty tereńdetýge yqpal etedi.

Aısýlýý Tynybekova — Azııanyń alty dúrkin chempıony, álemniń úsh dúrkin chempıony, Álem kýbogynyń ıegeri, halyqaralyq deńgeıdegi túrli jarystardyń júldegeri, 2021 jyly Tokıoda ótken Olımpıada oıyndarynyń kúmis júldegeri, 2024 jyly Parıjde ótken Olımpıadanyń qola júldegeri, Qyrǵyz Respýblıkasynyń eńbek sińirgen sport sheberi.

Aıta keteıik, V Dúnıejúzilik kóshpendiler oıyndary nátıjesinde Qazaqstan quramasy 44 altyn, 33 kúmis, 37 qola medalmen jalpykomandalyq esepte birinshi oryndy jeńip aldy.

Budan buryn Qazaqstanda ótken V Dúnıejúzilik kóshpendiler oıyny nesimen este qalǵanyn jazǵanbyz.

Sonymen qosa Dúnıejúzilik kóshpendiler oıyny týraly beınerolık «Webby Award» syılyǵyna úmitker atanǵany anyqtaldy.