VI Dúnıejúzilik kóshpendiler oıyndary: birinshi kúnniń nátıjesi qandaı
ASTANA. KAZINFORM — VI Dúnıejúzilik kóshpendiler oıyndary Qyrǵyz Respýblıkasynda 31 tamyz ben 6 qyrkúıek aralyǵynda ótip jatyr. Qazaqstan quramasy jarys reglamentinde bekitilgen 42 sport túri boıynsha 152 sportshy qatysady.
Týrızm jáne sport mınıstrligi baspasóz qyzmetiniń málimetinshe, oıyndardyń ashylý saltanatynda Qazaqstan Respýblıkasynyń memlekettik týyn kókpardan álem chempıony, komanda kapıtany Turǵanbek Qurmanbek ustap shyqty.
Jarystyń alǵashqy kúninde Qazaqstan quramasy ordo (asyq atý), togýz korgool (toǵyzqumalaq), kýrash, goresh, mongol boh sport túrleri boıynsha baq synady.
Toǵyzqumalaqshylar 6 qyrkúıekke deıin oınaıdy. Al asyqshylardyń aqtyq oıyndary 2 qyrkúıekke josparlanǵan. Kýrash boıynsha beldesken Jarylǵapov Nurdáýlet ırandyq balýannan jeńildi.
Mongol boh sportynan Amangeldi Erasyl men goreshten óner kórsetken Abdrahmanov Madııar qarsylastaryna ese jiberdi. Atalǵan úsh kúres boıynsha jarys aıaqtaldy.
Erteń, 2 qyrkúıekte, kókpar, kókbóri, er eńısh (aýdaryspaq), alysh, ovarı, mangala, togýz korgool (toǵyzqumalaq), at marafony, ordo, qusbeligik, jamby atý, dástúrli sadaq atý, taıaq tartý, arqan tartý, sýmo, strongmen, omyrtqa syndyrý boıynsha jarystar ótedi.
Osyǵan deıin búgin Sholpan-Ata qalasynda VI Dúnıejúzilik kóshpendiler oıyndary aıasynda ótetin kókbóri jáne kókpar týrnırlerine qatysatyn komandalardyń jerebesi tartylǵanyn jazdyq.
