Vetnamdyq kompanııa elimizdegi áýejaılardyń birin satyp alýǵa nıetti
ASTANA. KAZINFORM — Vetnamdyq SOVICO Group kompanııasy elimizdegi áýejaılardyń birin satyp alýǵa nıetti. Bul týraly premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Vetnam — Ońtústik-Shyǵys Azııadaǵy eń úlken seriktesterimizdiń biri. 2023 jyly taýar aınalymy 1 mlrd dollarǵa jýyqtady. Alaıda, obektıvti sebepterge baılanysty birshama tómendep ketti. Ótken jyldy 879 mln dollarmen aıaqtadyq. Negizinen ol jaqqa jartylaı fabrıkattar, shıkizat, myrysh, qorǵasyn, mys úlken kólemde jetkizemiz. Ol jaqtan turmystyq tehnıka men óńdelgen taýar alamyz. Vetnamda bul sala óte jaqsy damyǵan. Memleket basshysynyń sońǵy sapary barysynda Vetnamnyń ındýstrııalyq aımaǵyna da barǵan edik. Óte qatty unady. Ol jerde japondyq jáne Ońtústik Koreıalyq kompanııalar jumys isteıdi. Ózderiniń óndiristerin jolǵa qoıǵan. Sharttary óte jaqsy. Bul salada olardan úırenetin dúnıelerimiz bar, — dedi ol Aqordada BAQ ókilderiniń saýalyna oraı.
Vıtse-premer sol sapar qorytyndysynda Vetnamdyq SOVICO Group kompanııasy Qazaq Air kompanııasyn satyp alǵanyn eske salyp ótti.
— Taıaýda ǵana ol osynda kelip, men kezdestim. Ol áýejaıdy satyp alý nemese basqarýǵa alý múmkindigin qarastyryp otyr. Óıtkeni, kez kelgen áýe kompanııasy úshin qalaı degende de bazalyq áýejaı qajet. Kompanııa óte úlken. Halyqaralyq áýe kompanııalarymen de óte jaqsy baılanysy bar. Boıng kompanııasymen úlken kelisimshart jasasqan. Meniń túsinýimshe, ol borttarynyń bir bóligin Qazaqstanda damytqysy keledi. Ol áýe kompanııasyn úlkeıtpek. Sondyqtan taıaý ýaqytta Qazaqstanda taǵy bir úlken áýe kompanııasy ashylady, — dedi Serik Jumanǵarın.
Aıta keteıik, qazirgi ýaqytta Aqordada Memleket basshysy Qasym-Jomart Toqaev pen Qazaqstanǵa memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lam arasynda joǵary deńgeıdegi kelissóz júrip jatyr.
Buǵan deıin vetnamdyq ınvestor Qazaq Air áýe kompanııasynyń ataýyn ózgertkenin jazǵan edik.