Vetnamdyq ınvestor Qazaq Air áýe kompanııasynyń ataýyn ózgertti
ASTANA. KAZINFORM — Qazaq Air áýe kompanııasynyń ataýy VietJet Kazakhstan bop ózgeredi. Bul týraly «Samuryq-Qazyna» AQ Basqarma tóraǵasy Nurlan Jaqypov elordada Qazaqstan-Vetnam iskerlik dóńgelek ústelinde aıtty.
2023 jyly Qazaq Air kompanııasyn vetnamdyq VietJet Air satyp alatyny jarııalanǵan edi.
N. Jaqypovtyń aıtýynsha, bul mámile Jekeshelendirýdiń keshendi jospary aıasynda júzege asyryldy. Satyp alýshy retinde SOVICO Group kompanııasy belgilendi.
− Mámileniń barlyq sharttary oryndaldy, tólem qabyldandy, al aktsııalar ınvestordyń jeke shottaryna berildi. Atalǵan strategııalyq áriptestik áýe tasymaldaýshy men salanyń damýyna oń áser etýge baǵyttalyp qana qoımaı, Qazaqstan men Vetnam arasyndaǵy ekonomıkalyq baılanystardy nyǵaıtýdyń jańa kókjıekterin ashyp, ózara ósim men óńirlik qatynastardyń damýyna jol ashady. Biz SOVICO Group pen VietJet Air kompanııalarynyń Qazaq Air-di VietJet Kazakhstan jańa brendi aıasynda basqarýǵa jáne operatsııalyq qyzmetine qatysý nıetin joǵary baǵalaımyz. Óńirdegi marshrýttyq jeliniń keńeıýi kólik baılanysyn nyǵaıtyp, jańa ekonomıkalyq ósý núktelerin qalyptastyrady. Endi biz aýqymdyraq jáne bir-birimizge jaqynyraq bolamyz, − dedi Nurlan Jaqypov.
Eske salsaq, 2023 jyldyń jeltoqsanynda «Samuryq-Qazyna» Qazaq Air aktsııalaryn satyp alý-satý shartyna qol qoıylǵanyn habarlady.
2023 jyly Qazaqstan Vetnamnyń VietJet Air áýe kompanııasymen memorandým jasaǵan edi.
Bul rette vetnamdyq ınvestor birqatar mindetti oryndaıdy, kompanııanyń áýe parkin Boeing jáne Airbus ushaqtarymen tolyqtyrady.