Vetnamdaǵy sý tasqyny: Mınıstrlik qazaqstandyqtarǵa úndeý jasady
ASTANA. KAZINFORM — Syrtqy ister mınıstrliginiń resmı ókili, Halyqaralyq aqparat komıtetiniń tóraǵasy Aıbek Smadııarov Vetnamdaǵy qazaqstandyqtar týraly tilshiler suraǵyna jaýap berdi.
Vetnamnyń keıbir provıntsııalarynda jaýyn saldarynan sý tasqyny oryn alǵan edi.
— Onda demalyp jatqan týrıster sanyn «Týrıstik qamqor» týrıstik operatorlar qaýymdastyǵy arqyly anyqtaı alasyzdar. Biraq osy kúnge deıin bizdiń elshilikke nemese dıplomattarymyzǵa týrısterden birde-bir habarlama túspegen. Osyndaı jaǵdaıdyń ári qaraı da jalǵasatynyna úmittenemiz. Bul jańbyrly maýsym, tabıǵı jaǵdaı ekenin bári túsinedi. Sondyqtan biz azamattarymyzdan abaı bolýdy jáne jergilikti bılik aıtqan barlyq erejeni saqtaýdy suraımyz, — dedi Aıbek Smadııarov mınıstrlikte ótken brıfıngte.
Eske sala ketsek, Vetnamda birneshe kúnge sozylǵan nóser jańbyrdyń sońy sý tasqyny men kóshkinge ulasyp, keminde 90 adam qaza taýyp, taǵy 12 adam habar-osharsyz ketti.
Vetnam úkimetiniń málimetinshe, el boıynsha 186 000 úı zaqymdanǵan jáne úsh mıllıonnan astam mal qyrylǵan.
Resmı tulǵalardyń baǵalaýynsha, kelgen shyǵyn kólemi 300 mıllıon dollardan asqan.
Apatqa baılanysty Memleket basshysy Vetnam Kommýnıstik partııasy Ortalyq komıtetiniń Bas hatshysy To Lamǵa kóńil aıtty.