Vetnamdaǵy sý tasqynynan kelgen shyǵyn 300 mıllıon dollardan asty
ASTANA. KAZINFORM — Vetnamda birneshe kúnge sozylǵan nóser jańbyrdyń sońy sý tasqyny men kóshkinge ulasyp, keminde 90 adam qaza taýyp, taǵy 12 adam habar-osharsyz ketti. Bul týraly BBC habarlady.
Vetnam úkimetiniń málimetinshe, el boıynsha 186 000 úı zaqymdanǵan jáne úsh mıllıonnan astam mal qyrylǵan.
Resmı tulǵalardyń baǵalaýynsha, kelgen shyǵyn kólemi 300 mıllıon dollardan asqan.
AFP aqparat agenttiginiń derekterine súıensek, taý bókterindegi Daklak provıntsııasy qatty zardap shekken: 16 qarashadan beri ol jerde 60-tan astam ólim jaǵdaıy tirkelgen.
Sý tasqyndary sońǵy aılarda Vetnamdy jaılaǵan taǵy bir tótenshe aýa raıy qubylysyna aınaldy. Buǵan deıin elge birneshe apta aralyǵymen soqqan «Kalmaegı» jáne «Býaloı» taıfýndarynan keıin Vetnam edáýir zardap shekken bolatyn.
Sheneýnikterdiń aıtýynsha, jeksenbi tańyna deıin shamamen 258 myń adam elektr qýatynsyz qalǵan, sondaı-aq negizgi avtomagıstraldardyń jáne temirjol jelileriniń keıbir ýchaskeleri buǵattalǵan.
Eń kóp zardap shekken aımaqtarǵa kómek kórsetý úshin áskerı jáne polıtsııa kúshteri jumyldyryldy.
Úkimettiń málimdeýinshe, eń aýyr saldar Vetnamnyń ońtústiginde ornalasqan bes provıntsııada — Kýangngaı, Zıalaı, Daklak, Khanhoa jáne Lamdong óńirlerinde tirkelgen.
Al VietNam News Agency agenttiginiń habarlaýynsha, Vetnam Premer-mınıstriniń orynbasary Ho Dyk Fok 23 qarasha kúni 2025 jylǵa arnalǵan ortalyq bıýdjetiniń rezerv qorynan tórt provıntsııaǵa – Khanhoa, Lamdong, Zıalaı jáne Daklak óńirlerine – jýyrdaǵy sý tasqyndarynan kelgen eleýli shyǵynnyń saldaryn joıý úshin 1,1 trln dong (41,74 mln AQSh dollary) kóleminde shuǵyl kómek bólý týraly sheshimge qol qoıdy.
Aıta keteıik, joǵaryda atalǵan apatqa baılanysty Memleket basshysy Vetnam Kommýnıstik partııasy Ortalyq komıtetiniń Bas hatshysy To Lamǵa kóńil aıtty.
Jalpy, Vetnamda topan sý saldarynan qaza tapqandar sany 100-ge jýyqtady.