Vetnamdaǵy eń baı áıelderdiń biri ólim jazasyna kesilýi múmkin

ASTANA. KAZINFORM — Ekonomıkalyq salada alaıaqtyq jasaǵany úshin sottalǵan Vetnamdaǵy eń baı áıelderdiń biri Chyong Mı Lan apellıatsııalyq shaǵymda jeńildi. Bul týraly VVS habarlady.

Eger ol 9 mıllıard dollar jınaı almasa, ólim jazasyna kesilýi múmkin. Bul soma onyń alaıaqtyq jolymen tapqan qarajatynyń 75 paıyzyna teń.

Habarǵa sáıkes, 68 jastaǵy Chyong Mı Lan 2011-2022 jyldar aralyǵynda Saigon Commercial Bank-ten 304 trıllıon dong (shamamen 12,5 mıllıard dollar) nesıe alǵan. Bul Vetnamnyń 2022 jylǵy JІÓ-niń shamamen 3 paıyzyn quraıdy. Memleketke keltirgen jalpy shyǵyn 27 mıllıard dollarǵa baǵalandy.

Vetnam zańyna sáıkes, ekonomıkalyq qylmysy úshin ólim jazasyna kesilgen adamdar urlanǵan aqshanyń 75 paıyzyn qaıtarsa, aman qalýy múmkin. Osylaısha Chyong Mı Lan 9 mıllıard dollar tóleýi kerek. 

Onyń qorǵaýshylary apellıatsııalyq shaǵymda ómir boıyna bas bostandyǵynan aıyrýdy surady, óıtkeni ólim jazasy qajetti somany óndirýdi áldeqaıda qıyndatady.

Sot sheshiminen keıin Chyong Mı Lan prezıdentten raqymshylyq jasaýdy suraýǵa múmkindigi bar. Sot sheshimi qashan oryndalatyny belgisiz, óıtkeni Vetnamdaǵy ólim jazasynyń oryndalýy memlekettik qupııa sanalady. Ádette sottaý men ólim jazasyn oryndaý arasynda birneshe jyl ótedi.