Vetnamda joǵalǵan qazaqstandyq qyz aman-esen tabyldy
ASTANA. KAZINFORM – Keshe 26 jastaǵy Ásem Áýbákirdiń Vetnamda joǵalyp ketkeni týraly aqparat taraǵan bolatyn. Búgin ápkesi áleýmettik jelidegi paraqshasynda onyń tabylǵanyn habarlady.
Boıjetkenniń týysy izdeý jumystaryna atsalysqan memlekettik organdar men barsha jandarǵa alǵys bildirdi. Biraq Ásemniń densaýlyǵy men jaǵdaıy týraly tolyq málimetti ázirge jarııalamady.
– Eń basty maqsat – onyń qasyna tezirek jetý. Baǵasyna qaramaı, eń qysqa jolmen ushyp baratyn bılet izdep jatyrmyn. Qazir Ásemniń qasynda konsýl bar, - deıdi ápkesi Rýzana.
Eske sala keteıik, Ásem Áýbákir buǵan deıin 6 naýryz kúni Hoshımın qalasynda baılanysqa shyqqan. Sodan beri týystary ony taba almaı, dabyl qaqqan edi.
