Vetnamda týrısterge tropıkalyq jemisten erekshe taǵamdar usynylady
ASTANA. KAZINFORM — Vetnamda dýrıan ósiretin úsh eldiń aspazy gastronomııalyq týrızmniń bir bóligine aınalatyn erekshe taǵamdar ázirledi. Jańa retsepterdi Daklak provıntsııasynda ótetin dýrıan festıvali kezinde qonaqtarǵa tanystyrý josparlanyp otyr, dep habarlaıdy TV BRICS.
Vetnam, Taıland jáne Malaızııanyń bas aspazdary Daklak provıntsııasynda ótken gastronomııalyq shoýda bas qosyp, dýrıandy zamanaýı aspazdyqta paıdalanýdyń jańa tásilderin kórsetti. Olar jergilikti dýrıan surpyn óz elderiniń aspazdyq dástúrlerimen úılestirip, avtorlyq 7 taǵam ázirledi. Mázirge tiskebasarlar, negizgi taǵamdar men desertter engizildi.
Tanystyrylymnan keıin retseptter jetildirilip, provıntsııadaǵy meıramhanalarǵa, qonaqúılerge jáne qoǵamdyq tamaqtaný oryndaryna beriledi. Olar dýrıan jınaý maýsymy men 15 tamyz-2 qyrkúıek aralyǵynda ótetin Daklaktaǵy dýrıan festıvali kezinde keńinen qoldanylmaq.
Óńir bıligi festıval fermerlerdiń, kásipkerlerdiń, ǵalymdardyń, memlekettik qurylymdar men týrızm salasy ókilderiniń yntymaqtastyǵyn nyǵaıtýǵa yqpal etedi dep kútedi. Sondaı-aq joba aýyl sharýashylyǵy men týrızmniń damýyna serpin berip, jergilikti ónimniń shetel naryǵyna shyǵýyna múmkindik jasaıdy degen úmit bar.
Daklak provıntsııasynyń mádenıet, sport jáne týrızm departamenti dırektorynyń orynbasary Ngýen Kýok Hıepniń aıtýynsha, ulttyq ashana mádenı dástúrlerdi saqtaýǵa jáne óńirdiń tarıhyn qonaqtarǵa tanystyrýǵa kómektesedi.
Onyń sózinshe, dýrıannan daıyndalǵan árbir taǵam óńirdiń qunarly bazalt topyraǵy, fermerlerdiń eńbegi, zamanaýı tehnologııalardyń engizilýi jáne jergilikti ónimniń halyqaralyq deńgeıde tanymal brendke aınalý jolyn baıandaıdy.
Festıval uıymdastyrýshylary gastronomııalyq shoýdy baǵdarlamanyń turaqty bóligine aınaldyrýdy kózdep otyr. Qatysýshylar dýrıannyń taǵamdyq qundylyǵy, ony óńdeýdiń zamanaýı tehnologııalary jáne ónimniń qosylǵan qunyn arttyrý joldary týraly kóbirek bile alady. Joba avtorlarynyń pikirinshe, bul jemis ulttyq ashananyń tanymal ıngredıenti ǵana emes, Vetnamnyń gastronomııalyq kórikti oryndarynyń birine aınalady.
Aıta keteıik, Qazaqstan týrızm jáne qonaqjaılyq salasynda Taıland tájirıbesin meńgerýge nıetti.
