Vetnamda sý tasqynynan 37 adam qaza tapty

ASTANA. KAZINFORM — Vetnamnyń ortalyq provıntsııalarynda uzaqqa sozylǵan nóser jańbyr men qatty sý tasqyny saldarynyn 37 adam kóz jumdy, bes adam habar-osharsyz ketti, 78 adam jaraqat aldy, dep habarlaıdy Sınhýa. 

12,6 myńnan astam úı sý astynda qaldy, 103 qurylys tasqyn sýdan qırady nemese shaıylyp ketti, al 451-i zaqymdaldy.

Sý tasqyny shamamen 7 900 ga aýylsharýashylyq alqaptaryna da áser etti, 64 myńnan astam mal men qus qyryldy, sondaı-aq sýarý júıeleri men ózen jaǵalaýlaryna aıtarlyqtaı zııan keltirdi.

Ótken demalys kúnderinen beri Vetnamnyń jaǵalaýdaǵy provıntsııalarynda nóser jańbyr jaýyp, bir kúnde rekordtyq 1,7 metr jańbyr jaýdy, dep jazdy VnExpress. 

ıÝNESKO-nyń Dúnıejúzilik mura tizimine engen ejelgi Hoıan qalasyn da sý basty. Jergilikti ózen arnasynan asyp, 60 jyldaǵy eń joǵary deńgeıge jetkennen keıin turǵyndar kóshelerde aǵash qaıyqtarmen júrýge májbúr boldy.

Buǵan deıin Vetnamdaǵy «Matmo» taıfýny 330 mln dollardan astam shyǵyn keltirgenin jazǵan bolatynbyz.