Vetnamda sý tasqynynan keıin myńdaǵan úı sý astynda qaldy

Týrıster arasynda tanymal ári dúnıejúzilik mura nysany sanalatyn Vetnamnyń ejelgi Hıýe qalasy sársenbi kúni tolassyz jaýǵan jańbyr saldarynan sý astynda qalyp, myńdaǵan úıdi sý basty, dep habarlaıdy Kazinform CNA agenttigine silteme jasap.

Memlekettik BAQ-ta jarııalanǵan sýretterden turǵyndardyń sý basqan kóshelermen qaıyqpen júrip, úıler men kólikterdiń jartylaı sý astynda qalǵanyn kórýge bolady.

- Búkil qalany sý basyp qaldy, seısenbi kúngi jańbyrdan beri sý deńgeıi óte tez kóterilip jatyr, - degen qala turǵyny elektr qýatynyń óshirilgenin aıtty.

Dúısenbiden beri tolassyz jaýǵan jaýynnan jaǵalaýdaǵy birneshe provıntsııa turǵyndary da zardap shekti. Ortalyq provıntsııadan 2000-nan astam adam evakýatsııalandy. Úsh adam iz-túzsiz joǵalǵan.

Vetnamnyń soltústigi men ońtústigin baılanystyratyn ulttyq tas joldyń keıbir ýchaskeleri de sý tasqynyna baılanysty jabyldy.

Sınoptıkterdiń boljaýynsha, sý deńgeıi taǵy eki kún boıy joǵary bolýy múmkin.

Resmı statıstıkaǵa sáıkes, bıyl Vetnamda tabıǵı apattar, sonyń ishinde sý tasqyny men kóshkin 136 adamnyń ómirin qıdy.

Ǵalymdar klımattyń ózgerýine baılanysty álemde ekstremaldy aýa raıy oqıǵalary kúsheıip bara jatqanyn eskertti.