Vetnamda sý tasqyny men taıfýnnan zardap shekkenderge jeńildetilgen nesıe beriledi

ASTANA. KAZINFORM — Vetnam Premer-mınıstri sońǵy sel men taıfýndardan zardap shekken halyqqa nesıe qoldaýyn kórsetýdi tapsyrdy, dep jazady Sınhýa.

Vetnam Premer-mınıstri Fam Mın Chın sársenbi kúni eldiń Ulttyq bankine sońǵy selder men taıfýndardan keıin halyq pen bıznesti qoldaý úshin jeńildetilgen nesıeler berý máselesin qarastyrýdy tapsyrdy. Bul týraly «Vetnam daýysy» radıosy habarlady.

Sársenbi kúni jarııalanǵan úndeýinde úkimet basshysy ortalyq jáne ońtústik aımaqtardaǵy zardap shekken provıntsııalar men qalalar bıligin «Fenshen» jáne «Kalmaegı» taıfýndary saldarynan bolǵan shyǵyndar týraly esep berýge shaqyrdy.

Premer-mınıstr jergilikti bılikten turǵyndarǵa úılerin qalpyna keltirýde kúsh jumsaýdy talap etti.

Fam Mın Chınniń sózinshe, jumystar 2025 jylǵy 31 jeltoqsanǵa deıin aıaqtalýy tıis, sonda halyq jańa jyldy jańa úılerinde qarsy ala alady dep málimdedi.

Premer-mınıstr sondaı-aq negizgi ınfraqurylymdy, ásirese mektepterdi, medıtsınalyq pýnktter men aýrýhanalardy birden qalpyna keltirýdi tapsyrdy, bul bilim berý men densaýlyq saqtaý qyzmetteriniń úzdiksizdigin qamtamasyz etý úshin qajet.

Osyǵan deıin habarlanǵandaı, Fılıppındegi júzden asa adamnyń ómirin jalmaǵan «Kalmaegı» taıfýny Vetnamnyń ortalyq aımaqtaryna qaraı jyljyp keledi.

Vetnamnyń vıtse-premeri Tran Hong Ha «Kalmaegı» taıfýnyn «óte anomaldy kúshke ıe» dep sıpattap, jergilikti bılikti tez áreket etýge shaqyrdy.

«Kalmaegı» bıylǵy jyldyń eń qýatty taıfýndarynyń biri. Vetnamda sońǵy aptada rekordtyq jaýyn-shashyn men sý tasqyny bolǵany belgili. Tabıǵı apattan adam ólimi tirkeldi.