Vetnamda sý tasqyny men kóshkin saldarynan 10 adam qaza tapty
ASTANA. KAZINFORM — Vetnamnyń ortalyq aımaqtarynda tolassyz jaýǵan nóser jańbyrdan bolǵan sý tasqyny men laı kóshkini saldarynan keminde 10 adam qaza tapty. Bul týraly Anadolu jazdy.
Jergilikti bıliktiń málimetinshe, portty Danang qalasynda sý tasqyny saldarynan 6 adam kóz jumyp, 19 adam jaraqat alǵan. Qalada taǵy 4 adam iz-túzsiz joǵalyp ketken. Myńdaǵan úı men aýyl sharýashylyǵy alqaptary, sondaı-aq úı janýarlary tabıǵı apattan zardap shekti.
Hıýe qalasynda sý tasqyny saldarynan bir adam qaza taýyp, bes jasar qyz bala iz-túzsiz joǵalǵandar qatarynda tur.
Kýangngaı provıntsııasynda 120-dan astam kóshkin tirkelip, olardyń saldarynan keminde 3 adam qaza tapty.
Sý tasqyny men kóshkin birneshe avtojoldyń jabylýyna sebep boldy, ondaǵan adam kóliginiń ishinde qalyp qoıǵan.
Vetnamnyń meteorologııalyq basqarmasynyń málimetinshe, Hıýe qalasynda sońǵy 24 saǵat ishinde jaýyn-shashyn mólsheri rekordtyq deńgeıge jetken.
ıÝNESKO-nyń Búkilálemdik mádenı muralar tizimine engen ejelgi Hoıan qalasynda sý deńgeıi kúrt kóterilip, týrısterdi qaıyqpen evakýatsııalaýǵa týra kelgen.
Sonymen qatar qatty jaýǵan jańbyr saldarynan astana Hanoı men Hoshımın qalasy arasyndaǵy temirjol qatynasy ýaqytsha toqtatyldy. Bul myńdaǵan jolaýshynyń jol júrý josparyna keri áserin tıgizdi.
Eske sala ketsek, buǵan deıin Vetnamdaǵy «Matmo» taıfýny 330 mln dollardan astam shyǵyn keltirgenin jazdyq.
Sondaı-aq Vetnamda «Matmo» taıfýny týdyrǵan nóser jańbyr men sý tasqyny saldarynan 8 adam qaza taýyp, 5 adam jaraqat alǵanyn habarlaǵanbyz.