Vetnamda qazaq óneri keńinen tanystyryldy
ASTANA. KAZINFORM — Vetnamdaǵy Qazaqstan mádenıeti kúnderi aıasynda Hanoı qalasynda eki eldiń óner sheberleri qatysqan gala-kontsert ótti.
Ho Guom Opera teatrynda ótken is-sharada Aıda Balaeva quttyqtaý sóz sóıledi. Úkimet basshysynyń orynbasary Qazaqstan men Vetnamdy syılastyqqa, dostyq pen senimge negizdelgen berik qarym-qatynas baılanystyratynyn atap ótti. Memleket basshysy Qasym-Jomart Toqaevtyń Vetnamǵa resmı sapary barysynda bergen tapsyrmasyna sáıkes, Almaty qalasyndaǵy kóshelerdiń birine Vetnamnyń kórnekti memleket jáne saıası qaıratkeri Ho Shı Mınniń esimi berildi. Sonymen qatar Premer-mınıstrdiń orynbasary ulttyq biregeılikti nyǵaıtý men rýhanı murany saqtaýda mádenıettiń aıryqsha ról atqaratynyna toqtaldy.
— Óıtkeni mádenıet — tek ótkenniń murasy emes, búgingi qoǵamnyń rýhanı tiregi jáne keleshek urpaqqa qaldyratyn eń qymbat qundylyǵymyz. Qazaqstan óneri Uly dalanyń tereń tarıhynan, halqymyzdyń salt-dástúri men rýhanı bolmysynan bastaý alady. Qazaqtyń qońyr kúıi men ásem áni, dástúrli óneri men zamanaýı shyǵarmashylyǵy arqyly vetnamdyq kórermenge elimizdiń mádenı kelbetin tanystyrýdy zor mártebe sanaımyz, — dedi Aıda Balaeva.
Vetnam Sotsıalıstik Respýblıkasynyń vıtse-prezıdenti Vo Thı An Sýan Vetnamnyń mádenıet salasyndaǵy yntymaqtastyqqa eki el arasyndaǵy strategııalyq seriktestikti odan ári tereńdetýge yqpal etetin mańyzdy baǵyttardyń biri retinde zor mán beretinin atap ótti.
Gala-kontsertke Qazaqstan men Vetnamnyń kórnekti óner sheberleri qatysty. Baǵdarlamada qazaq kúıleri men halyq ánderi, sondaı-aq vetnamdyqtardyń keńinen tanymal «Nguoi Ha Noi» jáne «Hà Nội mười hai mùa hoa» shyǵarmalary oryndaldy. Qazaqstandyq jáne vetnamdyq ónerpazdar birlesip oryndaǵan «Dostyq áýenderi» kompozıtsııasy mádenı dıalogtyń erekshe nyshanyna aınaldy. Bul týyndyda vetnamnyń «Trống Cơm» halyq áni men Qurmanǵazynyń «Jıma» jáne «Balbyraýyn» kúıleriniń áýenderi úılesim tapty.
Aıta ketelik Vetnamdaǵy Qazaqstan mádenıeti kúnderi aıasynda Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva Vetnam Sotsıalıstik Respýblıkasy Premer-mınıstriniń orynbasary Fam Thı Than Chamen kezdesken edi.
