Vetnamda «Kadzıkı» taıfýnynan 12 myńnan astam úı qırap, 7 adam qaza tapty

ASTANA. KAZINFORM — Vetnam úkimeti «Kadzıkı» taıfýnynan zardap shekkender týraly aqparatpen bólisti, dep habarlaıdy Report.

Úkimet saıtynda jarııalanǵan aldyn ala málimetterge sáıkes, taıfýn saldarynan bolǵan tolassyz jańbyr 7 adamnyń ómirin qıdy. Sondaı-aq tabıǵı apattan 12 myńnan astam úı qırady. El astanasy Hanoıdyń basym bóligin sý basty.

Sonymen qatar sý tasqynynan 81,5 myń gektardan astam kúrish alqaby men 4,5 myń gektar basqa da aýyl sharýashylyǵy daqyldary joıylyp, 1,6 mıllıon adam elektr jaryǵynsyz qaldy.

Vetnam premer-mınıstri Fam Mın Chın eldiń mınıstrlikteri men vedomstvolary, iri korporatsııalardyń basshylaryna jáne provıntsııalyq bılikke arnalǵan joldaýǵa qol qoıdy. Qujatta taıfýnnyń zardaptarymen kúresý boıynsha nusqaýlyqtar tizimi berilgen. Atap aıtqanda, úılerdi, kóliktik jáne jelilik ınfraqurylymdy qalpyna keltirý, iz-túzsiz joǵalǵan adamdardy izdeý, aýyl sharýashylyǵyna keltirilgen shyǵyndy azaıtý úshin kúshter men quraldardy jumyldyrý tapsyryldy. 

Vetnam meteorologııalyq agenttiginiń habarlaýynsha, 27 tamyzda jaýyn-shashyn jalǵasady, soltústik pen soltústik-shyǵystaǵy keıbir aýdandarda 70 mm-ge deıin jańbyr jaýýy múmkin. Sonymen qatar 9 provıntsııada sý tasqyny qaýpi bar.

Eske sala keteıik, Vetnamda taıfýnnan 7 myń úı búlingeni jaıly jazǵan edik.