Vetnamda «Býaloı» taıfýny keltirgen zalal 303 mln dollarǵa baǵalandy

ASTANA. KAZINFORM — Vetnam úkimeti osy aptada el aýmaǵyna soqqan «Býaloı» taıfýnynyń saldarynan shamamen 8 trıllıon dong nemese 303 mıllıon AQSh dollary kóleminde shyǵyn kelgenin málimdedi. Bul týraly AZERTADJ habarlaıdy.

Aldyn ala baǵalaýlarǵa sáıkes, sársenbi kúni jarııalanǵan esepte shamamen 170 myń úıdiń sý astynda qalǵany nemese búlingeni kórsetilgen.

Dúısenbi kúni «Býaloı» taıfýny Vetnamnyń ortalyq soltústik bóligine soqty, ol alyp teńiz tolqyndaryn, qatty jel men nóser jaýyn alyp keldi. Keminde 29 adam qaza taýyp, taǵy 22 adam iz-túzsiz joǵalǵan. Bul týraly tabıǵı apattarmen kúres agenttiginiń esebinde habarlaǵan, dep jazady Reuters agenttigi.

Taıfýn joldar men mektepterge, keńselerge aıtarlyqtaı zııan keltirip, elektr jelileriniń úzilýine sebep boldy. Ondaǵan myń otbasy jaryqsyz qaldy. Sonymen qatar, 34 myń gektarǵa jýyq kúrish pen basqa da aýyl sharýashylyǵy daqyldary joıylǵan.

Alaıda esepte ónerkásiptik nysandarǵa keltirilgen iri shyǵyn týraly aıtylmaǵan.

Taıfýn Vetnamnyń soltústiginde sý tasqyndaryn týyndatyp, el astanasy Hanoımen áýe jáne temirjol qatynasyn toqtatty. Mektepter jabylyp, kóptegen úı sý astynda qalǵan.

Ońtústik Qytaı teńizine qaraǵan uzyn jaǵalaý syzyǵy bar Vetnam taıfýndarǵa jıi ushyraıdy. Olar adam ólimine jıi ákelip jatady. Ótken jyly «ıAgı» taıfýny shamamen 300 adamnyń ómirin qıyp, Vetnamnyń soltústigine 3,3 mıllıard dollar kóleminde shyǵyn keltirgen bolatyn.

Budan buryn habarlanǵandaı, jaqynda Qytaıdyń ońtústigindegi tabıǵı apatqa baılanysty 1,89 mıllıonnan astam adam qaýipsiz jerge kóshirildi.