Vetnamda bilim alý úshin 3 bilim granty bólindi
ASTANA. KAZINFORM — «Halyqaralyq baǵdarlamalar ortalyǵy» AQ Qazaqstan Respýblıkasynyń Úkimeti men Vetnam Respýblıkasynyń Úkimeti arasyndaǵy Kelisim sheńberinde Vetnam Sotsıalıstik Respýblıkasynyń joǵary oqý oryndarynda bakalavrıat baǵdarlamalary boıynsha 2026-2027 oqý jyldaryna oqýǵa qujattar qabyldaýdy jarııalaıdy.
Qazaqstan azamattaryna «bakalavrıat» bilim berý baǵdarlamasy boıynsha 3 grant bólindi.
Oqý tili – vetnam tili.
Vetnam tilin meńgermegen úmitkerler Vetnam joǵary oqý oryndarynda bir jyldyq tildik kýrsynan óte alady.
Konkýrsqa qatysý úshin saýalnamanyń applıkatsııalyq nysanyn toltyrý qajet. Toltyrý kezinde tizimnen JOO tańdaý kerek. Mamandyqtar tizimimen tańdalǵan ýnıversıtettiń saıtynda tanysýǵa bolady.
Grant kelesi shyǵyndardy qamtıdy:
- tegin oqý;
- jataqhanada turý;
- shákirtaqy.
Qujattardy 2026 jylǵy 15 mamyrdan bastap 2026 jylǵy 12 maýsymdy qosa alǵanda «Elektrondyq úkimet» portaly arqyly nemese «Halyqaralyq baǵdarlamalar ortalyǵy» AQ-da qolma-qol tapsyrýǵa bolady.
Shetelde oqýǵa úmitkerlerdi irikteý kelesi týrlar arqyly júzege asyrylady:
- Táýelsiz saraptamalyq komıssııa múshelerimen úmitkerlerdiń derbes áńgimelesýin onlaın rejımde ótkizý.
- Úmitkerlerdiń materıaldaryn qaraý jáne Qorytyndy komıssııanyń sheshim shyǵarýy.
Úmitkerlerdi irikteý úshin negizgi ólshemsharttar:
- baldyq júıe boıynsha shet tilin bilý deńgeıi;
- bilim týraly qujattyń baldyq júıe boıynsha ortasha baly;
- Táýelsiz saraptamalyq komıssııanyń baǵasy.
Qaǵıdalardyń 17-tarmaǵyna sáıkes, halyqaralyq sharttar/kelisimder sheńberinde shetelde oqýǵa úmitkerlerdi irikteý kezinde ball teń bolǵan jaǵdaıda myna tómendegiler ballmen basymdyqqa ıe bolady (kelesi retpen):
- jetim balalar men ata-anasynyń qamqorlyǵynsyz qalǵan balalar;
- «Densaýlyq saqtaý salasyndaǵy esepke alý qujattamasynyń nysandaryn bekitý týraly» Qazaqstan Respýblıkasy Densaýlyq saqtaý mınıstriniń mindetin atqarýshynyń 2020 jylǵy 30 qazandaǵy № QR DSM 175/2020 buıryǵymen (Normatıvtik quqyqtyq aktilerdi memlekettik tirkeý tiziliminde № 21579 bolyp tirkelgen) bekitilgen № 072/ý nysany boıynsha medıtsınalyq anyqtama (shetelge shyǵatyndar úshin) usynǵan, medıtsınalyq qorytyndyǵa sáıkes tıisti sheteldik bilim berý uıymdarynda oqýǵa bolatyn bala kezinen múgedekter jáne múgedek balalar;
- kóp balaly otbasynan shyqqan balalar;
- aýyldyq eldi mekennen shyqqan, sońǵy 2 (eki) jylda aýyldyq eldi mekende turatyn úmitkerler;
- sheteldik joǵary jáne joǵary oqý oryndarynan keıingi bilim berý uıymdarynan shaqyrýy bar úmitkerler, sondaı-aq sheteldik joǵary oqý oryndarynda bilim alýshylar.
Іrikteý qorytyndysy boıynsha usynylǵan úmitkerlerdiń tizimi qabyldaýshy tarapqa jiberiledi. Sońǵy sheshimdi qabyldaýshy tarap qabyldaıdy.
Qujat tapsyrý boıynsha tolyq aqparatpen jadynamadan tanysýǵa bolady. 21-tarmaqtyń 4) tarmaqshasyna sáıkes konkýrs jeńimpazynyń shetelde akademııalyq oqýdy aıaqtaǵannan keıin mindetti túrde Qazaqstan Respýblıkasyna qaıta oralýy jáne (bir) jyl merzimmen úzdiksiz eńbek qyzmetin júzege asyrýy kózdelgen.
Aıta ketelik týrızm salasy boıynsha halyqaralyq grantqa ótinim qabyldaý bastalǵan edi.
