Vetnamda 6,8 mln dollardyń kontrafaktilik taýary tárkilendi
ASTANA. KAZINFORM – Vetnamnyń eń iri qalasy Hoshımınde 2026 jyldyń on aıynda kontrafaktilik, kontrabandalyq jáne shyǵý tegi belgisiz taýarlardy satýǵa qatysty 6 myńnan astam zańbuzýshylyq anyqtaldy, dep habarlaıdy VNA.
Qalalyq ónerkásip jáne saýda departamentiniń málimetinshe, mamandar osy kezeńde 6 357 tekserý júrgizip, 6 069 zańbuzýshylyq boıynsha shara qabyldaǵan.
Tekserý barysynda jalpy quny 174 mlrd dongtan asatyn (shamamen 6,78 mln dollar) 6 mıllıonnan astam taýar tárkilendi. Aıyppuldar men bıýdjetke túsken basqa da túsimderdiń somasy 106 mlrd dongtan asty.
Zańbuzýshylyqtardyń basym bóligi shyǵý tegi belgisiz ónimderdi satýǵa qatysty bolǵan. Sonymen qatar kontrafaktilik taýarlardy satý boıynsha 2 myńnan astam, kontrabandalyq ónimderdi ótkizý boıynsha 263 derek tirkeldi.
Bılikti ásirese ınternet arqyly jalǵan ónimderdiń taralýy alańdatyp otyr. Satýshylar jalǵan akkaýnttardy paıdalanyp, baılanys derekterin jıi ózgertedi jáne taýarlardy bólek qoımalarda saqtaıdy. Bul tekserý jumystaryn qıyndatady.
2027 jylǵy Aı kúntizbesi boıynsha Jańa jyl qarsańynda bılik azyq-túlik, kıim-keshek, aıaq kıim jáne kosmetıka saýdasyna, sondaı-aq ınternet-dúkender men áleýmettik jeliler arqyly satylatyn taýarlarǵa baqylaýdy kúsheıtedi.
Buǵan deıin Jambyl oblysynda Apple, Puma jáne Hugo Boss brendteriniń kontrafaktilik ónimderi tárkilengeni habarlanǵan edi.