Vetnamda 18 adam esirtki qylmysy úshin ólim jazasyna kesildi
Vetnamda esirtki kontrabandasymen jáne satýmen aınalysqan 18 adamnyń ishinde Ońtústik Koreıanyń eki azamatyna ólim jazasy taǵaıyndaldy, dep málim etti memlekettik BAQ. Kazinform bul týraly CNA basylymyna silteme jasap habarlaıdy.
Ońtústik Koreıa polıtsııasynyń burynǵy ofıtseri 63 jastaǵy Kım Sýn Sık pen onyń otandasy 30 jastaǵy Kan Son Hok Vetnamnyń Hoshımın qalasynda tórt kúnge sozylǵan sot sheshimimen ólim jazasyna kesildi, dep habarlady memlekettik BAQ jeksenbi kúni.
Sot protsesinen keıin 58 jastaǵy Qytaı azamaty Lı Tıan Gýan men olardyń 36 jastaǵy vetnamdyq basshysy Le Ho Vý jáne basqa da 14 adamǵa ólim jazasy taǵaıyndaldy.
Top 2020 jyldyń mamyr aıynan maýsymǵa deıin «216 keliden astam esirtkini zańsyz saqtap, satqan jáne almasyp otyrǵan». 168 keliden astam «esirtki túri tárkilendi» dep habarlady Cong an Nhan dan. Basylym onyń qandaı túrleri tabylǵanyn naqtylamady.
Esirtki Kambodjadan Hoshımınge jetkizilgen, onyń bir bóligi el ishinde paıdalanylsa, ekinshi bóligi Ońtústik Koreıaǵa jóneltilipti.
Resmı málimdeme boıynsha, Ońtústik Koreıaǵa ótý úshin shekaralyq tirkeýden ótip jatqan kólikti 19 shilde kúni Hoshımınde qyzmetkerler teksergen. Іshinen «jalpy kólemi 39,5 keli bolatyn, aq krıstaldar salynǵan 40 plastık qap» tabyldy.
BAQ aqparatynsha Vý «zańsyz esirtki tasymaldaǵany» jáne «jalǵan mór men qujattar paıdalanǵany» úshin aıypty dep tanyldy.
Qalǵan 17 adam «esirtkini zańsyz saqtaǵany», «esirtkini zańsyz satqany» jáne «esirtkini zańsyz paıdalanýdy uıymdastyrǵany» úshin sottaldy, dep habarlady memlekettik BAQ.
Úsh adam «esirtki saýdasy» úshin ómir boıyna bas bostandyǵynan aıyrylsa, kámelet jasyna tolmaǵan bir bala 15 jylyn qamaýda ótkizetin boldy.
Vetnam soty esirtkige qatysty qylmys jasaǵan adamdardy jıi ólim jazasyna kesedi.
Amnesty International dereginshe, el álemde ólim jazasy boıynsha kósh bastap tur.
Ólim jazasy boıynsha aqparattyq ortalyq (Death Penalty Information Center) málimetinshe, byltyr Vetnamda 100-den astam adam ólim jazasyna kesilgen.
