Vetnam parlamenttik delegatsııasy Qazaqstanǵa keledi

Vetnam parlamenttik delegatsııasy Qazaqstannyń Senat jáne Májilis tóraǵalarymen kezdesedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi. 

«2023 jylǵy 25-28 qyrkúıek aralyǵynda Vetnam Kommýnıstik Partııasy Ortalyq komıtetiniń múshesi jáne VSR Ulttyq jınalysy Tóraǵasynyń birinshi orynbasary Ngýen Khak Dın basqaratyn parlamenttik delegatsııa Qazaqstanǵa keledi», - dedi A. Smadııarov aptalyq brıfıngide.

Onyń aıtýynsha, sapar barysynda Vetnam ókilderiniń QR Parlamenti Senatynyń tóraǵasy Máýlen Áshimbaev, QR Parlamenti Májilisiniń tóraǵasy Erlan Qoshanov, QR Premer-Mınıstriniń orynbasary Serik Jumanǵarın, Almaty qalasy ákiminiń orynbasary Arman Qyryqbaev pen QR Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalımen ekijaqty kezdesýleri josparlanǵan.

Budan bólek, 25-27 qyrkúıekte Búkilqytaılyq halyq ókilderi jınalysy Turaqty komıteti (BHÓJ TK) Syrtqy ister jónindegi komıteti tóraǵasynyń orynbasary Hao Pınniń Qazaqstanǵa sapary ótedi.

«Atalǵan sapar eki el arasyndaǵy parlamentaralyq ózara is-qımyldy odan ári jandandyrýǵa baǵyttalǵan. Sapar barysynda QR Parlamenti Májilisinde, Syrtqy ister mınıstrliginde, Qazaqstannyń strategııalyq zertteýler ınstıtýtynda jáne L. Gýmılev atyndaǵy Eýrazııa ulttyq ýnıversıtetinde kezdesýler uıymdastyrylady», - dedi resmı ókil.