Vetnam men Qazaqstannyń ortasynda ondaǵan jyl boıyna tyǵyz qarym-qatynas ornaǵan — To Lam
To Lam Memleket basshysy Qasym-Jomart Toqaev pen Qazaqstan halqyna qonaqjaılyq tanytqany úshin rızashylyǵyn bildirip, Vetnam Prezıdenti Lyong Kyongtyń ystyq yqylasyn jetkizdi. Bul týraly Aqordanyń baspasóz qyzmeti habarlady.
— Vetnam men Qazaqstannyń ortasynda ondaǵan jyldar boıyna tyǵyz qarym-qatynas ornaǵan. 1959 jyldyń tamyz aıynda bizdiń Prezıdentimiz Ho Shı Mın Qazaqstanǵa resmı saparmen kelgen bolatyn. Bul sapar qos halyq arasynda dástúrli dostyq pen uzaqmerzimdi seriktestiktiń berik negizin qalady. Sodan beri eki eldiń baılanysy kóshbasshylar men azamattardyń kúsh-jigeri arqasynda udaıy damyp keledi. Qazaqstan erterekte elimizdegi ult-azattyq kúreske kómek kórsetti, qazirgi kezde de bizdi jan-jaqty qoldap keledi. Sol úshin Vetnam halqy men partııasy sizderge dán rıza, — dedi Vetnam Kompartııasy OK Bas hatshysy.
Qasym-Jomart Toqaev elimizde Vetnam mádenıetiniń kúnderin ótkizýdiń mańyzyna toqtalyp, onyń mádenı dıalog pen halyqtar birligin nyǵaıtýǵa septigin tıgizetinin aıtty.
Prezıdent mártebeli meımanǵa Otan qorǵaýshy kúni qarsańynda áskerı parad ótetinin aıta kelip, Qazaqstan men Vetnamnyń áskerı-tehnıkalyq seriktestigin nyǵaıtýǵa otandasymyz, general-leıtenant Jansen Kereevtiń eleýli úles qosqanyn atap ótti.
Jansen Kereev 1982 jyly Vetnam halyq armııasy shtabynyń aǵa keńesshisi retinde issaparǵa jiberilgen. Ol Vetnam Qarýly kúshterin birge qurysyp, eldiń qorǵanys qabiletin nyǵaıtýǵa atsalysty. Ho Shı Mınniń sheshimimen Jansen Kereev Vetnamnyń eń joǵary áskerı nagradasy — Qyzyl tý ordenimen marapattaldy.
Kezdesý sońynda Prezıdent Bas hatshy To Lamnyń elimizge sapary qazaq-vetnam dostyq baılanystary tarıhyndaǵy jańa kezeńge jol ashatynyna senim bildirdi.
Aıta ketelik Vetnam Kommýnıstik partııasy Ortalyq komıtetiniń bas hatshysy To Lam Qazaqstan men Vetnam arasyndaǵy saýda-ekonomıkalyq yntymaqtastyq qarqyndy damyp keletini týraly aıtqan edi.