Vetnam, Marokko: Qazaqstan astyq naryǵyn keńeıtip jatyr
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Senattyń jalpy otyrysynda astyq eksportynyń jańa naryqtary týraly málimet berdi.
— Eksportty qoldaý — mańyzdy baǵyt. Mysaly, bıdaı eksportyna memleketten qoldaý kórsetip otyrmyz. Árıne, bul jaıynda esh jerde jarııa túrde aıtpaımyz. Biraq sizderdiń aldaryńyzda aıtýǵa bolady dep oılaımyn. Biz Vetnamǵa da jetkize bastadyq Keshe Marokkoǵa alǵashqy partııasy ketti. Qazir Ázerbaıjanda birinshi orynda turmyz. Arpa eksporty boıynsha Iranda kóshbasshymyz. Buryn bolmaǵan naryqtarǵa qaıtyp oraldyq, — dedi ol.
Aıtýynsha, Qazaqstan 11 aıǵa jetpeıtin ýaqyttyń ishinde shashamen 11 mln tonna aýylsharýashylyq ónimin eksportqa shyǵarǵan.
Aıta ketý kerek, Vetnamǵa eksporttalatyn joǵary sapaly bıdaı Qytaıdyń Lıanıýngan porty arqyly ótip jatyr.