Vetnam Qazaqstannyń qaı salalaryna qyzyǵyp otyr
ASTANA. KAZINFORM — «Kazakh Invest» UK AQ tóraǵasynyń orynbasary Madııar Sultanbek Qazaqstan men Vetnam arasynda qandaı kelisimsharttar ornaǵanyn, Vetnam kásipkerlerin qaı salalar qyzyqtyratynyn aıtyp berdi.
− Búgingi forým birneshe aıǵa sozylǵan kelissózderdiń nátıjesi. Bul kelissózder Vetnam bıznes qaýymdastyǵy men qazaqstandyq kásipkerlerdiń, ulttyq kompanııalar men memlekettik organdardyń qatysýymen ótti. Sondaı-aq, búgingi forým tolyǵymen vetnamdyq tarap esebinen uıymdastyryldy. Bul da Vetnam bıznesiniń Qazaqstanmen yntymaqtastyqqa zor qyzyǵýshylyǵyn kórsetedi, búgin Vetnamnyń 20-dan astam iri kompanııasy arnaıy keldi, − dedi M. Sultanbek tilshilerge bergen suhbatynda.
Onyń aıtýynsha, Vetnam Qazaqstan úshin ınvestıtsııa tartý men yntymaqtastyq ornatýdyń óte qyzyqty úlgisi bolyp otyr.
− El aýmaǵy salystyrmaly túrde shaǵyn bolǵanymen, Vetnamnyń álem elderimen saýda aınalymy óte joǵary, JІÓ kólemi de orasan. Olar kórshiles eldermen, ásirese Qytaımen tıimdi qarym-qatynas ornata alǵan. Qytaıdyń kóptegen kompanııalary óndiristerin Vetnam aýmaǵynda ashqan. Sonyń arqasynda Vetnamnyń jyldyq saýda aınalymy júzdegen mıllıard dollardy quraıdy. Demek Vetnamnan úırenetinimiz kóp, − dedi spıker.
Qazirgi tańda eki el arasyndaǵy ınvestıtsııalyq yntymaqtastyq aıasynda 3 ınvestıtsııalyq joba júzege asyrylyp jatyr. Olardyń biri — vetnamdyq SOVICO Group kompanııasynyń Qazaq Air áýe kompanııasynyń aktsııalaryn satyp alýy. Bul joba is júzinde aıaqtalýǵa jaqyn.
Oǵan qosa, Almaty oblysyndaǵy týrızm salasyna qatysty joba jáne Mareven Food kompanııasymen birlesken tamaq ónerkásibi salasyndaǵy joba bar.
Sonymen birge, Vetnamnyń munaı-gaz sektorynda jumys isteıtin kompanııalary úlken qyzyǵýshylyq tanytyp otyr. Olar «QazMunaıGaz» ulttyq kompanııasymen yntymaqtastyq ornatýǵa múddeli.
− Ózderińiz bilesizder, Qazaqstan sýarmaly jáne egistik jerlerdiń kólemi boıynsha álemde altynshy orynda tur. Bul shyn máninde, óte úlken artyqshylyq. Qazaqstan topyraǵynyń quramynda hımııalyq zattardyń az bolýymen erekshelenedi, ıaǵnı jerimiz ekologııalyq turǵyda taza. Sondyqtan bizdiń elde óndiriletin azyq-túlik ónimderi de ekologııalyq taza ónim retinde tanylýy múmkin. Al bul qazirgi naryqta joǵary baǵalanady jáne biz mundaı ónim úshin qosymsha baǵa suraı alamyz. Tutynýshylar mundaı sapa úshin tóleýge daıyn, − dedi Madııar Sultanbek.
Aıta keteıik, Qazaqstan men Vetnam arasyndaǵy taýar aınalymy 860 mıllıon dollarǵa jetti.
Buǵan deıin vetnamdyq ınvestordyń Qazaq Air áýe kompanııasynyń ataýyn ózgertkeni habarlanǵan edi. Endi Qazaq Air VietJet Kazakhstan atýymen jumys istemek.
Sondaı-aq, QR Premer-Mınıstriniń orynbasary Ermek Kósherbaev Qazaqstan men Vetnam yntymqtastyǵynyń úsh perspektıvalyq baǵytyn aıtty.