Vetnam Qazaqstan ınvestorlarynyń tabysty qyzmeti úshin bar jaǵdaı jasaýǵa daıyn – To Lam
ASTANA. KAZINFORM – 2030 jylǵa deıin Qazaqstan men Vetnamnyń taýar aınalymyn 5 mıllıard dollarǵa jetkizý úshin 3 negizgi baǵyt boıynsha baılanys nyǵaıtylady. Bul týraly elimizge memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lam aıtyp berdi.
− 1992 jyly Vetnam men Qazaqstan arasynda dıplomatııalyq qatynastar ornaǵan sátten bastap saıasat, dıplomatııa, mádenıet, qoǵam, ǵylym men tehnıka salalarynda eleýli tabystarǵa qol jetkizdik. Ekijaqty jáne kópjaqty qatynastar qarqyndy damyp keledi. Alaıda bizdiń elder arasyndaǵy ekonomıkalyq, saýda jáne ınnovatsııalyq yntymaqtastyq áli de bolsa tómen deńgeıde jáne qos taraptyń áleýeti men qajettilikterine saı kelmeı otyr. Ótken jyly ekijaqty taýar aınalymy shamamen 1 mıllıard dollardy qurady, al jalpy ınvestıtsııa kólemi nebári 5 mıllıon dollar shamasynda ǵana bolǵan, − dedi To Lam elordada ótken Qazaqstan-Vetnam iskerlik dóńgelek ústelinde.
Onyń aıtýynsha, Vetnam men Qazaqstanda ınvestıtsııalyq jáne saýda yntymaqtastyǵyn keńeıtýge qolaıly múmkindik kóp. Birinshiden, ekijaqty qatynastar nyǵaıa túsýde, ásirese 2023 jyldyń tamyzynda Qazaqstan Prezıdentiniń Vetnamǵa resmı sapary men búgingi kezdesýden keıin ilgerileý bar.
− Ekinshiden, eki taraptyń da ekonomıkasy ashyq, eksport mańyzdy ról atqarady jáne halyqaralyq saýda prıntsıpterine beıimdele alady. Úshinshiden, eki el de Vetnam men EAEO arasyndaǵy erkin saýda kelisimine qatysady, bul saýda-ekonomıkalyq baılanysty tereńdetýge jáne taýar aınalymyn arttyrýǵa qolaıly jaǵdaı jasaıdy. Tórtinshiden, eki tarap 2023–2025 jyldarǵa arnalǵan saýda-ekonomıkalyq yntymaqtastyqty jedeldetýge baǵyttalǵan birlesken is-sharalar josparyna qol qoıdy. Besinshiden, Vetnamnyń iri áýe kompanııalary, sonyń ishinde Vietjet Vetnam men Qazaqstan arasynda tikeleı reıster ashty, bul bizdiń elder arasyndaǵy ınvestıtsııalyq, saýda jáne týrıstik qyzmetti edáýir jeńildetedi, − dedi ol.
Sonymen birge, Qazaqstan Astanada halyqaralyq qarjy ortalyǵyn sátti damytyp keledi, al Vetnam Hoshımınde jáne Danangta osyndaı ortalyqtar quryp jatyr. Vetnam bul baǵytta Qazaqstannyń tájirıbesin qabyldaýǵa múddeli jáne Astana halyqaralyq qarjy ortalyǵymen kapıtal naryǵy, ındekster, jasyl qarjy jáne basqa da perspektıvaly baǵyttar boıynsha yntymaqtastyqty nyǵaıtqysy keledi.
− Vetnam Qazaqstannyń Ortalyq Azııadaǵy rólin joǵary baǵalaıdy jáne bolashaqta strategııalyq seriktestik ornatyp, yntymaqtastyqty damytýǵa talpynady. Biz 2030 jylǵa deıin ekijaqty taýar aınalymyn 5 mıllıard dollarǵa jetkizý úshin 3 negizgi baǵyt boıynsha baılanysty nyǵaıtamyz. Sondaı-aq, eki eldiń iskerlik qaýymdastyǵyn bar múmkindikterdi paıdalanyp, qosylǵan quny joǵary ónimderdi jasaýǵa jáne keńeıtýge, eki eldi jahandyq naryqpen baılanystyrýǵa shaqyramyn. Búgin Vetnamnyń kóptegen jetekshi kompanııalary qatysyp otyr, olarmen Qazaqstan munaı men gaz, energetıka, aýyl sharýashylyǵy, týrızm, toqyma óndirisi, hımııa ónerkásibi sııaqty salalarda yntymaqtasa alady, − dedi To Nam.
Sondaı-q, Vetnam partııasynyń hatshysy Qazaqstanda óndiriletin bylǵary ónimderdiń áleýeti qor ekenin, al Vetnam – aıaq kıim óndirisi boıynsha álemdik kóshbasshy ekenin basa aıtty. Sondyqtan vetnamdyq kompanııalar bul salaǵa ınvestıtsııa sala alady jáne bul taýarlar Qazaqstan naryǵynda ǵana emes, Ortalyq Azııaǵa, tipti basqa elder men aımaqtarǵa da eksporttala alady.
− Qazaqstan aýmaǵy jaǵynan álemde 9-orynda, Vetnamnan segiz ese úlken, biraq halqy nebári 20 mıllıon. Al Vetnam aýmaǵy shaǵyn bolsa da, halqy 100 mıllıonnan asady, sondyqtan bizde eńbek kúshi óte mol. Qazaqstan paıdaly qazbalarǵa baı, bul ózara yntymaqtastyqty damytý úshin zor múmkindik beredi. Biz bir-birimizge qoldaý kórsetip, birge damýymyz kerek. Bul ekijaqty yntymaqtastyq pen jalpy órkendeýdi ilgeriletý úshin pikir almasýǵa jaqsy múmkindik dep bilemin. Eki eldiń memlekettik organdary men mınıstrlikterine ınvestıtsııalyq jáne saýda-ekonomıkalyq yntymaqtastyqty jandandyrý sharalaryn ashyq talqylaýdy usynamyn. Vetnamnyń Kommýnıstik partııasy, Ulttyq jınalysy jáne úkimeti Qazaqstan ınvestorlarynyń Vetnamdaǵy tabysty qyzmeti úshin barynsha qolaıly jaǵdaı jasaýǵa daıyn. Biz sizderdiń tabystaryńyzdy óz jetistigimiz jáne maqtanyshymyz dep bilemiz, − dedi Vetnam Kommýnıstik partııasy Ortalyq Komıtetiniń Bas hatshysy.