Vetnamda «Kadzıkı» taıfýnyna baılanysty shuǵyl sharalar qolǵa alyndy

ASTANA. KAZINFORM - Vetnam dúısenbi kúni soqqan «Kadzıkı» sýpertaıfýnyna baılanysty shuǵyl sharalar qabyldady, dep habarlaıdy jergilikti BAQ.

Jaǵalaýdaǵy provıntsııalarda 587 myń adamdy kóshirý jospary ázirlendi. Keıbir aımaqtarda 25 tamyz kúni tańǵy saǵat 7:00-den bastap turǵyndarǵa úılerinen shyǵýǵa tyıym salyndy.

Tabıǵı apat kólik qatynasyn tolyqtaı derlik toqtatty, áýejaılardyń jumysy toqtap, poıyzdar keshigip jatyr, joldarda qozǵalys shekteldi. Balyq aýlaýshylardyń kemelerine teńizge shyǵýǵa tyıym salyndy.

Sınoptıkterdiń málimetinshe, birqatar óńirde 150-250 mm, keı jerlerde 600 mm-ge deıin jaýyn-shashyn bolýy yqtımal. Jel ekpini saǵatyna 166 shaqyrymǵa jetedi. Daýyl qurlyqqa tereńdeı ene kele, birtindep álsireıdi.

Mınıstrlikterge, provıntsııalardyń ákimshiligine jáne evakýatsııa júrgizý, bógetter men sý qoımalaryn nyǵaıtý, baılanys jelileriniń úzdiksiz jumysyn qamtamasyz etý tapsyryldy. Vetnam Syrtqy ister mınıstrligi Qytaı men Fılıppın elshilikterine vetnamdyq balyqshylar men daýylda qutqarý úshin kemelerge kómek kórsetý týraly nota joldady.

Vetnam halyq armııasyna jergilikti bılikpen árekettesip, qaýip joǵary aımaqtardy anyqtaý jáne turǵyn úılerdi, mektepterdi, ınfraqurylym nysandaryn bekitýge kómektesý tapsyryldy. Kóshkinder men kenetten bolatyn sý tasqyndary qaýpi bar aýdandarǵa halyqty evakýatsııalaý úshin áskerı bólimshelerdiń sarbazdar jiberildi.

Qaýip-qaterge aýyl sharýashylyǵy da ushyrady. Naqtyraq aıtqanda, shamamen 300 myń gektar kúrish alqaby, 77 myń gektardan astam jemis baǵy jáne 57 myń gektar kaýchýk plantatsııasyna zııan kelýi múmkin.

Osyǵan deıin Taıvande «Danas» taıfýnynan 500-den astam adam zardap shekkeni týraly jazdyq.