Vetnam ınvestorlary Almatyda jańa týrıstik keshen salady

ASTANA. KAZINFORM — Qazaqstan men Vetnam arasyndaǵy taýar aınalymy 860 mıllıon dollarǵa jetti. Bul týraly QR Premer-Mınıstriniń orynbasary Ermek Kósherbaev elordada Qazaqstan-Vetnam iskerlik dóńgelek ústelinde aıtty.

− Qazaqstan úshin Vetnam − Ońtústik-Shyǵys Azııadaǵy jetekshi seriktesterdiń biri. Bizde saýda-ekonomıkalyq yntymaqtastyqty keńeıtýge aıtarlyqtaı áleýetimiz bar. Ótken jyly elderimiz arasyndaǵy taýar aınalymy 860 mıllıon AQSh dollaryna jetti. Qazaqstanda ekonomıka salasynyń túrli baǵyttarynda vetnamdyq kapıtaly bar 13 kompanııa jumys isteıdi. Bul kórsetkishter − elimizdiń bıznes-klımatyna degen senimniń aıqyn dáleli ári turaqty jáne nátıjeli áriptestiktiń kórsetkishi, − dedi Ermek Kósherbaev.

Premer-Mınıstr orynbasary Qazaqstan men Vetnam arasynda júzege asyp jatqan mańyzdy jobalardy atap ótti.

− Olardyń qatarynda Qonaev qalasyndaǵy «Arna» ındýstrııalyq aımaǵynda azyq-túlik ónimderin óndirýmen aınalysatyn Mareven Food Holdings kompanııasy bar. Sonymen birge, kópfýnktsıonaldy týrıstik keshen jobasyn iske asyryp jatqan Crystal Bay Tourism Group kompanııasyn da atap ótýge bolady. Biz sizdermen birlesip, Qazaqstanda jańa óndirister ashýǵa múddelimiz. Investorlarǵa qolaıly jaǵdaı qalyptastyrý — ulttyq deńgeıdegi basymdyq sanalady.Úkimet salyq, keden jeńildikterinen bastap, ınfraqurylym, zattaı granttarǵa deıin keń aýqymdy qoldaý sharalaryn usynady. Biz joǵary qosylǵan quny bar jobalarǵa baǵyttalǵan vetnamdyq áriptesterimizdiń talpynysyn tolyq qoldaımyz, − dedi Ermek Kósherbaev.

Buǵan deıin vetnamdyq ınvestordyń Qazaq Air áýe kompanııasynyń ataýyn ózgertkeni habarlanǵan edi. Endi Qazaq Air VietJet Kazakhstan atýymen jumys istemek. 

Memleket basshysy Qasym-Jomart Toqaev Aqordada Qazaqstanǵa memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lamdy qarsy aldy.