Vetnam EAEO-ǵa JI salasyndaǵy yntymaqtastyqty keńeıtýdi usyndy
ASTANA. KAZINFORM — Vetnam Premer-mınıstriniń orynbasary Ho Kýok Zýng Vetnam men Eýrazııalyq ekonomıkalyq odaq arasynda jasandy ıntellekt salasyndaǵy yntymaqtastyqty keńeıtýdi usyndy. Bul baǵytqa tehnologııalardy retteý tásilderimen almasý, derekterdi qorǵaý, kıberqaýipsizdik jáne birlesken zertteýler júrgizý kiredi.
Astanada ótken V Eýrazııalyq ekonomıkalyq forýmnyń plenarlyq otyrysynda Ho Kýok Zýng forýmnyń qazirgi taqyrybyna joǵary baǵa berip, onyń qalyptasyp jatqan jahandyq trendter aıasynda asa ózekti ekenin atap ótti.
Onyń aıtýynsha, jasandy ıntellektini talqylaý strategııalyq mańyzǵa ıe, sebebi tehnologııalar memlekettik basqarý men ulttyq básekege qabilettiń jańa resýrsyna aınalyp otyr.
— EAEO men Vetnam arasyndaǵy qoldanystaǵy kelisim eki taraptyń ekonomıkalyq yntymaqtastyǵyna berik negiz qalyptastyrdy. Bul qazirdiń ózinde jaqsy nátıjelerge alyp keldi. Jańa jaǵdaıda biz qolda bar yntymaqtastyq baǵyttaryn tehnologııa salasyndaǵy jańa baǵyttarmen tolyqtyrýymyz qajet, — dedi ol.
Vetnam vıtse-premeriniń aıtýynsha, taraptar jasandy ıntellektini jaýapty paıdalaný saıasaty, derekterdi qorǵaý standarttary jáne kıberqaýipsizdik máseleleri boıynsha tájirıbe almasa alady.
Sonymen birge, spıker «aqyldy» aýyl sharýashylyǵy, ýrbanıstıka jáne kólik salalaryndaǵy JI zertteýleri men ázirlemeleri boıynsha yntymaqtastyqty tereńdetýdi, sondaı-aq kıbernetıka men ınformatıka salasyna maman daıarlaý úshin ǵylymı-zertteý ortalyqtary men bilim berý mekemeleri arasyndaǵy baılanysty kúsheıtýdi usyndy.
— Jasandy ıntellekt dáýiri áldeqashan bastalyp ketti. Bul syn-qaterler ǵana emes, yntymaqtastyqty durys jolǵa qoıyp, der kezinde sheshim qabyldaı alatyn elder úshin úlken múmkindik te. Vetnam EAEO-ny osy baǵyttaǵy senimdi seriktes retinde qarastyrady jáne eki taraptyń múddesine saı ortaq jasandy ıntellekt keńistigin qalyptastyrýǵa múddeli, — dedi Ho Kýok Zýng.
