Vetnam «bir otbasy - eki bala» saıasatyn toqtatady
HANOI. KAZINFORM – Vetnam úkimeti «bir otbasy - eki bala» saıasatyn toqtatyp, halyq sanynyń azaıýyna qarsy jańa sharalar qabyldaıdy. Endi ár otbasy bala sanyn óz qalaýy boıynsha sheshedi.
«Bir otbasy - eki bala» saıasaty 1988 jyly el ekonomıkasyn josparly júıeden naryqtyq ekonomıkaǵa kóshirý kezinde halyq sanynyń turaqtylyǵyn qamtamasyz etý maqsatynda qabyldanǵan. Alaıda sońǵy jyldary halyq sanynyń azaıýy men qart adamdardyń kóbeıýi ekonomıkalyq jáne áleýmettik qaýipter týyndatyp, bul saıasatty qaıta qaraýǵa májbúr etip otyr.
Vetnam densaýlyq saqtaý mınıstri Dao Hong Lannyń aıtýynsha, halyq sanynyń qysqarýy eldiń uzaq merzimdi turaqty damýyna, ulttyq qaýipsizdigi men qorǵanysyna aıtarlyqtaı qaýip tóndiredi. Mınıstr bul máseleni strategııalyq deńgeıde sheshý qajet ekenin aıtyp, demografııalyq saıasat endi bala sanyn shekteýmen ǵana emes, halyqtyń sapasy men tepe-teń damýyna baǵyttalýy tıistigine toqtalady.
- 1999 - 2022 jyldary Vetnamda árbir áıelge orta eseppen 2,1 baladan keletin. Bul - halyq sany turaqty saqtalýy úshin qajetti deńgeı. Alaıda sońǵy jyldary bul kórsetkish kúrt tómendep, 2024 jyly el tarıhyndaǵy eń tómen deńgeı 1,91 balaǵa deıin azaıdy, -deıdi Dao Hong Lan.
Hoshımın men Hanoı syndy iri megapolısterde bala týý kórsetkishi odan da tómen - 1,39. Mundaı quldyraýǵa ómir súrý qunynyń joǵary bolýy áser etken. Jastar úılenýdi de, balaly bolýdy da keıinge qaldyrady.
Oǵan qosa, elde erler kóbeıip barady. Sońǵy málimetterge sáıkes, 100 qyz balaǵa 111 uldan keledi. Bul jynysty tańdaý tájirıbesiniń jalǵasyp jatqanyn ańǵartady. Vetnamda zań júzinde balanyń jynysyn ataýǵa tyıym salynǵanymen, keı dárigerler ony jasyryn túrde jetkizip otyrady.
- 2039 jylǵa qaraı 15 pen 49 jas aralyǵyndaǵy er adamdar sany 1,5 mıllıonǵa artýy múmkin, -dep málimdegen eldiń statıstıka basqarmasy.
Hoshımın bıligi halyq sanynyń tómendeýine qarsy kúres aıasynda 35 jasqa deıingi áıelderge eki bala týǵany úshin birjolǵy qarjylaı kómek berýdi qolǵa aldy. Degenmen, sarapshylar mundaı sharalardyń jetkiliksiz ekenin aıtady.
- Naǵyz ózgeris úshin dekrettik demalysty uzartý, áke demalysyn engizý jáne otbasy ınstıtýtyna keshendi qoldaý qajet, - deıdi dáriger Tran Ngok Haı.
Onyń pikirinshe, týý kórsetkishin arttyrý úshin turǵyn úı baǵasyn tómendetý, bilim men medıtsına sapasyn kóterý, salyqtyq jeńildikter usyný mańyzdy.
Vetnam úkimeti qazirgi demografııalyq ahýaldy eskere otyryp, naqty derekterge negizdelgen jańa halyq sany týraly zań jobasyn ázirlemek. Birǵanym Álıqyzy