Vetnam 2030 jylǵa qaraı elge 50 mln sheteldik týrıst tartýdy kózdep otyr
ASTANA. KAZINFORM – Vetnam 2030 jylǵa qaraı 45–50 mln sheteldik týrıst qabyldap, týrızmnen 80–90 mlrd dollar kiris alýdy josparlap otyr. Bul týraly Vetnam aqparat agenttigi (VNA) habarlady.
Úkimettiń týrızmdi ekonomıkanyń negizgi draıverine aınaldyrýǵa baǵyttalǵan baǵdarlamasynda salaǵa basymdyq tek týrıster sanyn arttyrýǵa emes, qyzmet sapasyn, tıimdilikti, turaqtylyqty jáne qosylǵan qundy ulǵaıtýǵa beriledi.
2030 jylǵa qaraı týrızmniń eldiń jalpy ishki ónimindegi úlesin 10–12 paıyzǵa jetkizý kózdelgen. Sonymen qatar Vetnam Ońtústik-Shyǵys Azııadaǵy týrızm kólemi men ósim qarqyny boıynsha úzdik úsh eldiń qataryna kirýdi maqsat etip otyr.
Úkimet kóp shyǵyn jumsaıtyn týrısterdi tartýǵa jáne olardyń elde uzaq ýaqyt bolýyna basymdyq beredi. Osy maqsatta mádenı týrızm, iri týrıstik-saýyqtyrý keshenderi, teńiz jáne aral týrızmi, ózen jáne jaǵalaý baǵyttary, medıtsınalyq jáne saýyqtyrý týrızmi, sondaı-aq gastronomııalyq týrızm damytylady.
2026–2035 jyldarǵa arnalǵan Ulttyq týrızmdi ilgeriletý baǵdarlamasy týrızmdi mádenı dıplomatııamen, ulttyq taǵamdarmen, kıno, óner, sport, festıvalder jáne halyqaralyq is-sharalarmen baılanystyra otyryp nasıhattaýdy kózdeıdi. Sondaı-aq Vetnam sheteldik naryqtarda tsıfrlyq platformalar men jańa medıany belsendi paıdalanbaq.
2035 jylǵa deıin ulttyq týrıstik brendti damytý bastamasy Vetnamdy tarıhı murasy, ulttyq taǵamdary, jaǵajaılary, mádenıeti men ómir salty arqyly tanymal, qaýipsiz ári sapaly týrıstik baǵyt retinde tanytýdy kózdeıdi.
Budan bólek, elde tsıfrlandyrý, jasyl týrızm jáne ǵylym men tehnologııalardy engizý arqyly týrızmdi basqarý júıesi jańǵyrtylady. Vetnam «aqyldy» týrıstik baǵyttardy damytý, ekologııalyq taza kólik pen energııany paıdalaný jáne aınalym ekonomıkasy qaǵıdalaryn engizý josparlaryn júzege asyrmaq.
Eske sala ketsek, bıyl sheteldik baǵyttar arasynda Vetnam, Mysyr, Taıland, Túrkııa, Qytaı jáne Maldıv araldary suranysqa ıe bolyp otyrǵanyn jazdyq.
Al SІM qazaqstandyq týrısterge Vetnamda jańa onlaın tirkeý júıesi paıda bolǵanyn eskertti.
Sondaı-aq Vetnamǵa kirýdiń jańa erejelerin myna jerden bile alasyz.
