Veterınarlyq-sanıtarlyq qaýipsizdikti qamtamasyz etý máseleleri talqylandy
ASTANA. Qarashanyń 30-y. QazAqparat /Quralaı Orynbekqyzy/ - Búgin QR Aýyl sharýashylyǵy mınıstrliginde «Veterınarııa týraly zań veterınarlyq-sanıtarlyq qaýipsizdikti qamtamasyz etýdiń negizi» taqyrybynda baspasóz máslıhaty ótti,
dep habarlaıdy QazAqparat.
«Shilde aıynda Elbasy «QR Veterınarııa týraly» Zańyna birqatar ózgerister men tolyqtyrýlar engizý týraly» Zańyna qol qoıǵandyǵy málim. Búgin osy Zańnyń keıbir normalaryn jáne osy ózgerister men tolyqtyrýlardyń engizilý sebepterin túsindirý úshin jınalyp otyrmyz. Atalmysh Zańnyń negizgi maqsaty - veterınarııa salasyndaǵy zańnamalyq bazany jetildirý», dedi Mal sharýashylyǵy jáne veterınarııalyq qaýipsizdik departamentiniń dırektory Rabıǵa Toqseıitova. Baspasóz máslıhatynda qabyldanǵan normalardy túsindirý úshin barlyq aımaqtarda basshylardyń jáne agroónerkásiptik keshen (AÓK) Memlekettik ınspektsııa komıtetiniń mamandarynyń, jergilikti atqarýshy organdar ákimderiniń, oblystar men aýdandardyń aýyl sharýashylyǵy basqarmalary basshylarynyń, veterınarlyq zerthanalardyń, veterınarlyq uıymdar jumyskerleriniń, veterınarlyq lıtsenzıat dárigerlerdiń qatysýymen semınar-keńester júrgizilgendigi aıtyldy.
«Zańǵa sáıkes, aýmaqtaǵy veterınarlyq-sanıtarlyq qaýipsizdikti qamtamasyz etý maqsatynda oblystardyń jáne aýdandardyń jergilikti atqarýshy organdarynyń quramynda veterınarlyq bólimsheler qurylady. Zańdy qabyldaýmen jáne veterınarlyq-sanıtarlyq qaýipsizdikti qamtamasyz etý maqsatynda satýǵa arnalǵan maldy aýlada soıýǵa tyıym salynady, ıaǵnı keıin satýǵa arnalǵan aýyl sharýashylyǵy maldaryn soıý tek qana etti qaıta óńdeý kásiporyndarynda, mal soıý beketterinde nemese aýyl sharýashylyǵy maldaryn soıý alańdarynda júzege asyrylýy qajet», - dep atap ótti R.Toqseıitova.
