Veterınarlyq máselesin túbegeıli sheshý úshin bilim týraly zańnamaǵa ózgertý engizý qajet - I.Saýer
ASTANA. 17 naýryz. QazAqparat /Marlan Jıembaı/ - Veterınarlyq máselesin túbegeıli sheshý úshin bilim týraly zańnamaǵa ózgertý engizý qajet.
Bul pikirdi búgin Aýyl sharýashylyǵy mınıstrliginde ótken Et jáne sút óndirýshiler men óńdeýshilerdiń ekinshi forýmynda QR Et-sút odaǵy basqarmasynyń tóraǵasy Ivan Saýer aıtty.
Mal sharýashylyǵy salasyn bilikti mamandarmen qamtamasyz etý máselesin de tysqary qaldyrmaǵan ol: «Kóptegen aýyl sharýashylyq qurylymdarynyń bilikti mamandarǵa muqtaj bolyp otyrǵandyǵy eshkimge qupııa emes. Veterınarlar máselesi bizdiń barlyq josparlarymyzda kúrmeýi qıyn másele bolýy múmkin. Jaǵdaıdy túbegeıli ózgertý úshin bilim týraly zańnamaǵa ózgertý engizý qajet», - dedi.
Onyń atap ótýinshe, elordadaǵy S.Seıfýllın atyndaǵy Qazaq agrotehnıkalyq ýnıversıtetinen jyl saıyn shamamen 100 adam veterınar mamandyǵyn alyp shyqsa, onyń 80 paıyzy memlekettik grant esebinen bilim alǵandar. Degenmen, olardyń shamamen 30 paıyzy ǵana óz mamandyqtary boıynsha jumysqa ornalasady jáne tek 3 paıyzy ǵana aýyldy jerlerde óz mamandyqtary boıynsha eńbek etedi.
«Bilim alýǵa memleket qarjysy shyǵyndaldy. Al jaýapkershilik men mindetteme oqýǵa túsetinderge júktelmegen», - dep atap ótken I.Saýerdiń pikirinshe, memleket esebinen bilim alǵan túlekterge zańnamamen jaýapkershilik júkteý qajet. Sonymen qatar aýyl sharýashylyǵy oqý oryndaryna stýdentterdi qabyldaý barysynda aýyl mektebin bitirgen túlekterge basymdyq berý kerek.
«Biz únemi Pavlovtyń «dáriger adamdy, al veterınar dáriger adamzatty emdeıdi» degen qanatty sózin eske alamyz. Meniń oıymsha, eger biz veterınar dárigerge aýyldyq medıtsına qyzmetkerlerine, muǵalimderge, mádenıet qyzmetkerlerine beriletin jeńildikter men preferentsııalardy bersek ádildik bolar edi», - dedi.
