Veterınarlyq ınspektsııa qyzmetin sapaly deńgeıge kóterý qajet - ǵalym pikiri
ASTANA. 20 sáýir. QazAqparat - Veterınarlyq ınspektsııa qyzmetin sapaly deńgeıge kóterý qajet.
Bul týraly búgin elordada «Qazaqstan Respýblıkasyndaǵy veterınarııanyń jaǵdaıy jáne damý perspektıvasy» taqyrybynda ótken halyqaralyq konferentsııada S.Seıfýllın atyndaǵy Qazaq agrotehnıkalyq ýnıversıteti veterınarııa jáne mal sharýashylyǵy tehnologııasy fakýltetiniń dekany Balǵabaı Maıqanov aıtty.
Mal sharýashylyǵy salasynda qordalanǵan máselelerdi sheshý jáne veterınarııa júıesin damytý maqsatynda birqatar sharalardy iske asyrý qajettigin basa aıtqan ol: «Veterınarlyq ınspektsııa qyzmetin jańa sapaly joǵary deńgeıge kóterýimiz qajet. Bir jaǵynan, epızootıkalyq ahýalǵa jaýapty ete otyryp, zańdardyń oryndalý barysyn qadaǵalaıtyn mamanmen tolyqtyryp, ekinshi jaǵynan tehnıkalyq-materıaldyq jabdyqtarmen jáne transporttyq quraldarmen qamtamasyz etýimiz kerek», - dedi.
Ǵalymnyń paıymynsha, veterınarııadaǵy ınspektsııalyq qyzmettiń tutastyǵyn qamtamasyz etý óte mańyzdy. Osyǵan oraı, veterınarlyq qadaǵalaýdy shekaradaǵy kedendik qyzmettiń baqylaýyna bermeý kerek.
«Sebebi mundaı qadam bekitilgen ortaq zańmen, ortaq normatıvtik aktilermen jumys jasaıtyn tutas veterınarlyq qyzmettiń birkelkiligin buzady», - dedi ol.
