Veterınarlyq ilespe qujattary joq 60 iri qara maldy el aýmaǵyna kirgizýge tyıym salyndy

ASTANA. KAZINFORM - QR Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń qyzmetkerleri «Syrym» veterınarııalyq baqylaý-ótkizý pýnktinde 60 bas iri qara maldy (ІQM) tıisti veterınarııalyq ilespe qujattarsyz el aýmaǵyna kirgizý áreketin toqtatty.

Bul týraly QR Aýyl sharýashylyǵy mınıstrliginiń baspasóz qyzmeti habarlady.

Reseı Federatsııasynan (Daǵystan Respýblıkasy) jáne Ózbekstan Respýblıkasynan kele jatqan júk kóligin tekserý barysynda Eýrazııalyq ekonomıkalyq odaq Komıssııasynyń 2010 jylǵy 18 maýsymdaǵy №317 sheshimimen bekitilgen veterınarııalyq-sanıtarııalyq sharalardy qoldaný talaptaryna sáıkes kelmeıtin zańbuzýshylyqtar anyqtaldy.

Anyqtalǵan quqyqbuzýshylyqtarǵa baılanysty kólik quraly Qazaqstan Respýblıkasy aýmaǵynan keri qaıtarylyp, júrgizýshige qatysty ákimshilik hattama toltyryldy.

Aıta keteıik, 2025 jyldyń basynan beri EAEO elderimen shekaradaǵy veterınarııalyq baqylaý beketterinde janýarlar men janýar tektes ónimderdi tasymaldaý kezinde veterınarııalyq talaptardy buzýdyń 261 faktisi tirkelgen. 127 tulǵaǵa ákimshilik hattama toltyrylyp, jalpy somasy 6,1 mln teńge kóleminde aıyppul salynǵan.

QR AShM Veterınarııalyq baqylaý jáne qadaǵalaý komıteti janýarlar men janýar ónimderin el aýmaǵyna kirgizý kezinde veterınarııalyq talaptardy qatań saqtaý qajet ekenin eske salady.

- Zań talaptarynyń saqtalmaýy bıologııalyq qaýipsizdikke qater tóndirip, janýarlar men adamdardyń densaýlyǵyna aıtarlyqtaı zııan keltirýi múmkin, - delingen habarlamada.

Osyǵan deıin maldy sáıkestendirý júıesi eýropalyq talapqa kóshetini týraly jazdyq.