Veterınarlarǵa ǵylymı dárejesi úshin qosymsha aqy tólenbek
ASTANA. KAZINFORM – Veterınarııa salasy mamandaryna ǵylymı dárejesi úshin qosymsha aqy tólenbek. Bul týraly Májilis depýtattarynyń saýalyna Premer-mınıstrdiń orynbasary – Ulttyq ekonomıka mınıstri Serik Jumanǵarınniń jaýabynda aıtylǵan.
- Veterınarııa mamandarynyń eńbegine aqy tóleý deńgeıin arttyrý maqsatynda 2023-2025 jyldary jergilikti atqarýshy organdarǵa respýblıkalyq bıýdjetten nysanaly transfertter túrinde 29,6 mlrd teńge baǵyttaldy. 2026-2028 jyldarǵa jyl saıyn 12,2 mlrd teńge kóleminde qarjylandyrý qarastyrylǵan. Nátıjesinde veterınarııalyq dárigerlerdiń ortasha jalaqysy 119,7 myńnan 271,5 myń teńgege deıin ósti. 2023 jyldan bastap veterınarııa mamandaryna І jáne ІІ toptaǵy patogendi bıologııalyq agenttermen jumys istegeni úshin tıisinshe 35 jáne 50 paıyz mólsherinde ústemeaqylar belgilendi. Sondaı-aq eki laýazymdyq aılyqaqydan kem emes mólsherde saýyqtyrý járdemaqysyn tóleý qarastyrylǵan, dedi Serik Jumanǵarın.
Onyń málimetinshe, 2025 jylǵy 9 qazandaǵy Respýblıkalyq bıýdjet komıssııasynyń otyrysynda Parlament depýtattary bastamashylyq etken «Veterınarııa máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasy tujyrymdamalyq túrde qoldaý tapty.
- Zań jobasy veterınarııa salasyndaǵy mamandardyń eńbekaqy deńgeıin odan ári arttyrýǵa baǵyttalǵan jáne jyl saıynǵy eńbek demalysyn berý kezinde kúntizbelik jylda bir ret saýyqtyrý járdemaqysyn tóleýdi, ǵylymı dárejesi úshin 17 AEK (ǵylym kandıdaty) jáne 34 AEK (ǵylym doktory) mólsherinde qosymsha aqy belgileýdi, sondaı-aq qosymsha yntalandyrýshy ústemeaqylardy engizýdi kózdeıdi, - dedi vıtse-premer.
Taıaýda Májilis qaraýyna «Qazaqstan Respýblıkasynyń keıbir zańnamalyq aktilerine veterınarııa máseleleri boıynsha ózgerister men tolyqtyrýlar engizý týraly» zań jobasy kelip túskenin jazǵan edik.