Veterınarlardyń jalaqysy kóterile me
ASTANA. KAZINFORM – Búgin – veterınarııa qyzmetkerleriniń kúni. Qazaqstandyq veterınarlar kásibı merekesin qalaı atap ótýde? Jibek Joly arnasynyń «Búgin LIVE» stýdııasyna qonaq bolǵan sala mamandary jaýap berdi.
– Bizde mereke qarsańynda biraz sharalar uıymdastyrylyp jatyr. Búgin veterınar mamandaryna beriletin syı sharalary da ótkizilip jatyr, - deıdi QR Aýyl sharýashylyǵy mınıstrligine qarasty Veterınarııa salasyndaǵy halyqaralyq yntymaqtastyq basqarmasynyń basshysy Qyzǵaldaq Jubatqanova.
Al Bıologııalyq qaýipsizdik basqarmasynyń bas sarapshysy jaqynda veterınarlardyń jalaqysy kóteriletinin jetkizdi.
– Qazir dál osy salada maman tapshylyǵy aýyl-aımaqtarda sezilip jatyr. Dese de keshe Úkimet otyrysynda Úkimet basshysy ákimdikterge jalaqyny kóterý boıynsha arnaıy tapsyrmalar berdi. Jalaqy kóterilgennen keıin bilikti mamandar da tartylady dep senemiz, - deıdi Azamat Ómirqul.
Mamandar bul sala tek janýarlardy emdeýmen shektelmeıtinin aıtady.
– Veterınarııa salasy tek qana janýarlardyń aýrýyn emdeýmen shektelmeıdi. Odan bólek, biz ózge memlekettermen de birlesip jumystar atqaramyz. Janýardan alatyn ónimderdi eksporttaýǵa arnalǵan veterınarııalyq qujattarǵa kelisimsharttar júrgizemiz. Sonymen qatar bizde shekarada baqylaý-qadaǵalaý, epızootııalyq ahýaldy baqylaý mindetteri bar. Temirjol, áýejaı beketterinde bizdiń veterınar ınspektorlar turady. Biz syrtqy elden ımporttalatyn taýarlardy qadaǵalaımyz. Ol ónimderdi ımporttaý aldynda biz sol elge tekserýge baramyz. Bul sala kúrdeli bolǵandyqtan biz jan-jaqty jumys isteımiz, - deıdi Qyzǵaldaq Jubatqanova.
Stýdııa qonaqtarynyń sózinshe, veterınarııa salasyna qyzyǵýshylardyń sany jyl sanap artyp keledi.
– Qazir jastardyń osy salaǵa degen qyzyǵýshylyǵy artyp kele jatyr. Óıtkeni qazirgi tańda memleket basshysynyń tapsyrmasymen veterınarııa salasyna úlken kóńil bólinýde. Jergilikti jerlerde materıaldyq-tehnıkalyq bazalary jańartylyp, jalaqysy kóterilýde. Jáne ár óńirde mamandardy yntalandyrý maqsatynda oqý-jattyǵý jıyndary da júrgiziledi, - deıdi Bıologııalyq qaýipsizdik basqarmasynyń bas sarapshysy.
Veterınarııa salasyndaǵy halyqaralyq yntymaqtastyq basqarmasynyń basshysy jas mamandardy ǵylymı baǵytta da jumys isteýge shaqyrdy.
– Jastarǵa tek mal aýrýymen shektelmeı, basqa da qyzyqty jumystarǵa nazar aýdarýyn aıtqym keledi. Bizde túrli qyzyqty baǵyttar kóp. Veterınarııa salasy ǵylymı túrde de jumys atqarady. Máselen, koronavırýs kezinde negizgi vaktsınalardy zerttep taýyp, shyǵarǵan – osy veterınarııa salasyndaǵy mamandar. Onda qyzmetkerler ártúrli aýrýlarmen jumys atqarady. Sol sebepti, biz mamandardy osy salaǵa shaqyramyz, - deıdi ol.
Eske sala keteıik, endi veterınarııalyq qujaty joq mal ónimin satqandar qylmystyq jaýapkershilikke tartylýy múmkin.
Odan bólek, jaqynda Aýyl sharýashylyq mınıstrligi Abaı oblysyndaǵy 10 aýdannyń jeteýinde veterınarııalyq stansa joq ekenin habarlady.