Veterınarlar qaǵazbastylyqtan bosatylady - AShM

ASTANA. QazAqparat – Veterınarlardyń jumysyn jeńildetýge arnalǵan arnaıy tsıfrlyq qosymsha iske qosyldy. Bul týraly Ortalyq kommýnıkatsııalar qyzmetinde QR Aýyl sharýashylyǵy vıtse-mınıstri Baǵlan Bekbaýov aıtty, dep habarlaıdy QazAqparat tilshisi.

Onyń aıtýynsha, veterınarlyq dárigerler úshin barlyq tıisti veterınarlyq is-sharalardy ýaqtyly júrgizý úlken problema boldy. Veterınarlar shalǵaı ýchaskelerge baryp, derekterdi jýrnalǵa engizýge jáne qaıtyp oralǵannan keıin jumystyń nátıjelerin «Aýyl sharýashylyǵy janýarlaryn ındentıfıkatsııalaý» aqparattyq júıesine engizýge májbúr. Bul jumystarǵa kóp ýaqyt bólý kerek.

«Osy máseleni sheshý úshin mınıstrlik smartfondarǵa, planshetterge tıisti qosymsha (VetLab) ázirledi. Byltyrǵy jeltoqsan aıynan bastap osy júıe Batys Qazaqstan oblysynda ilki joba retinde engizildi. Biz bul tájirıbeni ońtústik óńirlerde jalǵastyrdyq. Qazirgi kezde Túrkistan oblysynda da osyndaı pılot joba iske qosyldy. Sonymen qatar, qalǵan óńirler de osy talaptarǵa saı kelip tur. Sondyqtan tıisti qural-jabdyqtar men planshetter satyp alynady», - dedi Baǵlan Bekbaýov.

Aýyl sharýashylyǵy mınıstrligi málimetine qaraǵanda, atalǵan qosymsha aqparat jınaýdy, berýdi jáne taldaýdy avtomattandyrady. Bul turǵyda veterınar qaǵazbastylyqtan bosatylyp, mal ónimderin naqty baqylaý múmkindigi paıda bolady. Baılanys joq jerlerde yńǵaıly bolý úshin osy qosymsha ınternetsiz jumys isteı alady.

Veterınarlar shalǵaı ýchaskelerge baryp, bul qosymsha arqyly mal basyn tirkeı alady, derekqor arqyly teksere alady, sondaı-aq júrgizilgen veterınarııalyq is-sharalardy kórsete alady.