Veterınarııanyń tıimdiligin arttyrý: bıýdjetten qosymsha qarajat bólinedi
ASTANA. KAZINFORM — Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine veterınarııa máseleleri boıynsha ózgerister men tolyqtyrýlar engizý týraly» zań jobasy kelip tústi.
Qujat jobasy veterınarııa qyzmetiniń tıimdiligin arttyrýǵa baǵyttalǵan jáne bul saladaǵy zańnamany odan ári jetildirý maqsatynda ázirlendi.
Májilis depýtaty Serik Egizbaevtyń aıtýynsha, zań jobasynda veterınarııa salasyndaǵy ókilettikterdi memlekettik basqarý deńgeıleri arasynda ajyratý, jergilikti atqarýshy organdar qurǵan veterınarııalyq uıymdarǵa tán emes fýnktsııalardy alyp tastaý, veterınarııa salasynda tıisti mamandardyń quqyqtary men zańdy múddelerin bildirý jáne qorǵaý, olardy esepke alý, biliktiligin arttyrý maqsatynda veterınarııalyq palata nysanyndaǵy qoǵamdyq uıymnyń veterınarııalyq statýarlyq organ qurý eskerilgen.
Sonymen qatar, qujatta veterınarııalyq preparattardyń aınalymy rásimderin EAEO qujattaryna sáıkestendirý, bul saladaǵy mamandarǵa áleýmettik qoldaý sharalaryn kórsetý jáne jergilikti atqarýshy organdar qurǵan memlekettik veterınarııalyq uıymdary mamandaryn arnaıy kıimmen qamtamasyz etý qarastyrylǵan.
— Zań jobasynyń erejelerin iske asyrýǵa memlekettik bıýdjetten jyl saıyn shamamen 27 mlrd teńge qosymsha shyǵyndardy bólý talap etiledi. Bul rette Úkimettiń oń qorytyndysy bar. Májilistiń Agrarlyq máseleler komıteti atalǵan zań jobasy boıynsha qorytyndy ázirleýge daıyn, — dedi depýtat Májilistiń jalpy otyrysynda.
Aıta keteıik, buǵan deıin aýyldaǵy veterınardyń jalaqysy ósetini málim boldy.
