Veterınarııany damytýǵa 66,2 mlrd teńge qarastyryldy
ASTANA. KAZINFORM — 2026–2027 jyldary respýblıkalyq bıýdjet qarajaty esebinen veterınarııalyq ınfraqurylymnyń taǵy 2 399 nysanyn qurý josparlanyp otyr.
Aýyl sharýashylyǵy mınıstri Aıdarbek Saparovtyń tóraǵalyǵymen ótken keńeste veterınarııalyq qaýipsizdik, ınfraqurylymdy damytý jáne salany tsıfrlandyrý máseleleri qaraldy. Keńeske mınıstrliktiń qurylymdyq bólimsheleriniń basshylary, komıtet tóraǵalary, vedomstvolyq baǵynysty uıymdar men óńirler ákimdikteriniń ókilderi qatysty.
— Memleket veterınarııalyq-sanıtarııalyq qyzmetti damytýǵa erekshe kóńil bóledi. Memleket basshysynyń tapsyrmasyna sáıkes, Mal sharýashylyǵyn damytýdyń keshendi josparymen qatar, 2026–2030 jyldarǵa arnalǵan Veterınarııany damytýdyń keshendi jospary bekitildi. Ony iske asyrýǵa 66,2 mlrd teńge qarastyrylǵan. Alaıda jergilikti jerlerde jumys tıisti deńgeıde júrgizilmeı otyr, — dedi Aıdarbek Saparov.
Aýyl sharýashylyǵy vıtse-mınıstri Amanǵalı Berdalınniń aıtýynsha, sońǵy eki jylda óńirlerde jergilikti atqarýshy organdardyń qarajaty esebinen jalpy quny 10,6 mlrd teńge bolatyn 626 veterınarııalyq ınfraqurylym nysany salyndy jáne satyp alyndy.
2026–2027 jyldary respýblıkalyq bıýdjet qarajaty esebinen veterınarııalyq ınfraqurylymnyń taǵy 2 399 nysanyn qurý josparlanyp otyr. 2026 jyly osy maqsattarǵa 36,3 mlrd teńge qarastyrylǵan. Bul qarajat 1 298 nysannyń qurylysyna baǵyttalady.
Sonymen qatar birqatar óńir belgilengen jumys kestesin saqtamaı otyr. Ásirese, Qostanaı, Aqmola, Qaraǵandy, Atyraý, Almaty jáne Pavlodar oblystarynda, sondaı-aq Abaı jáne Jetisý oblystarynda veterınarııalyq pýnktter qurylysynyń qarqyny tómendigi baıqalady.
Mal qorymdaryn salý boıynsha Qostanaı, Aqmola, Qyzylorda, Pavlodar jáne Túrkistan oblystarynda belgilengen jumys kestesinen saı emestigi baıqalady.
Mınıstr ákimdikterge veterınarııalyq pýnktter, mal qorymdary jáne aýdandyq veterınarııalyq stantsııalardyń qurylysyn jedeldetýdi tapsyrdy. Bul rette jer ýchaskelerin ýaqtyly bólýdi jáne ınjenerlik kommýnıkatsııalardy tartýdy qamtamasyz etýge erekshe nazar aýdarý qajet.
Keńeste aýyl sharýashylyǵy janýarlarynyń ıelerin «Tort Tulik» mobıldi qosymshasynda tirkeý máselesine de kóńil bólindi.
Mańǵystaý, Qaraǵandy, Shyǵys Qazaqstan, Aqtóbe, Pavlodar jáne Soltústik Qazaqstan oblystarynda oń dınamıkaǵa qaramastan, aýyl sharýashylyǵy janýarlary ıelerin tirkeý jetkilikti deńgeıde emes.
Veterınarııalyq baqylaý jáne qadaǵalaý komıtetiniń aýmaqtyq bólimsheleri men ákimdikterge aýyl sharýashylyǵy janýarlarynyń ıelerimen jumysty jandandyrý jáne júıemen qamtýdy odan ári keńeıtýdi qamtamasyz etý tapsyryldy.
Et pen janýarlardan alynatyn ónimderdiń qadaǵalaný júıesi «fermadan ústelge deıin» qaǵıdaty boıynsha engizilýde. Byltyrǵy sáýirden bastap «Veterınarııalyq-sanıtarııalyq saraptama» modýli jumys istep keledi.
Pılottyq rejımde soıý ónimderin paıdalanatyn nysandar — qoǵamdyq tamaqtaný oryndary, mektepter, balabaqshalar men aýrýhanalar esepke alynýda.
Búgingi tańda júıege 15 754 qoǵamdyq tamaqtaný nysany qosylǵan.
Qyzylorda, Pavlodar, Almaty, Atyraý jáne Qaraǵandy oblystarynda, sondaı-aq Ulytaý jáne Jetisý oblystarynda júıemen qamtý deńgeıi óte tómen.
Óńirlerge 2026 jylǵy 1 qazanǵa deıin nysandardy júıege qosýdy aıaqtaý tapsyryldy.
— Biz soıý nysandaryn salý jáne jańǵyrtý máselesinde bıznes pen ákimdikter tarapynan belsendiliktiń jetkiliksiz ekenin kórip otyrmyz. Bul rette memleket tıisti jobalardy iske asyrý úshin qoldaý sharalaryn qarastyrǵan, onyń ishinde jyldyq 2,5% mólsherlememen 10 jylǵa deıingi merzimge jeńildetilgen kredıt berý múmkindigi bar. Qazirgi ýaqytta jobalar tek Soltústik Qazaqstan jáne Jambyl oblystarynda iske asyrylýda. Jumysty kúsheıtý qajet, — dedi mınıstr.
Keńes sońynda Aıdarbek Saparov veterınarııalyq ınfraqurylym nysandarynyń qurylysyn jedeldetýdi jáne veterınarııalyq-profılaktıkalyq is-sharalardy kúsheıtýdi tapsyrdy.
