Veterınarııalyq qujattar tsıfrlyq formatqa kóshiriledi - AShM
«Tsıfrlyq transformatsııa ortalyǵy mınıstrlikpen birlesip, aýyl sharýashylyǵy janýarlaryn birdeılendirý, veterınarııalyq is-sharalar júrgizý jáne ruqsat qujattaryn alý sııaqty 30 bıznes úderisti qamtıtyn úsh ómirlik jaǵdaıdy taldap, reınjerıng júrgizdi. Aýyl sharýashylyǵy janýarlaryn birdeılendirý (AShJB) jáne Basqarýdyń biryńǵaı avtomattandyrylǵan júıesi (BBAJ) ázirlengen jáne 10 jyldan astam ýaqyt jumys isteıdi. Bul júıelerdegi derekter árdaıym ózekti bola bermeıdi, jumysta irkilister, al keıbir jaǵdaılarda derekterdiń qaıtalanýy men sáıkessizdik faktileri bar», - dedi E. Qarashókeev Májilistegi Úkimet saǵatynda.
Bul máseleni sheshý úshin Mınıstrlik mynadaı jumystardy júrgizýde:
- AShJB mobıldi qosymshasyn ázirleý, ol janýardyń bırkasyn skanerleýge jáne júıege derekterdi engizýge múmkindik beredi. Mobıldi qosymshanyń oflaın rejımde jumys isteý múmkindigi qarastyrylǵan;
- veterınarııalyq preparattardy qoldanýdy retteýge jańa aqparattyq júıeni ázirleý;
- veterınarııalyq is-sharalar boıynsha veterınarııalyq eseptilikti avtomattandyrý;
- veterınarııa salasyndaǵy memlekettik baqylaý men qadaǵalaýdy avtomattandyrý.
«Veterınarııa protsesterin tsıfrlandyrý jáne avtomattandyrý statıstıkalyq derekterdiń durystyǵyn qamtamasyz etedi, veterınarııalyq dárigerlerdi qaǵazbastylyqtan bosatady, eksportqa/ımportqa ruqsat berý qujattaryn alý kezinde merzimder men bıýrokratııalyq áýre-sarsańdy qysqartady, baqylaýdaǵy obektilerdiń ornyn aýystyrý men aınalymyn baqylaýdy kúsheıtedi, sondaı-aq sýbsıdııalar men jeńildikti kredıtter alý kezinde sybaılas jemqorlyq pen alaıaqtyq táýekelderdi tómendetedi», - dedi mınıstr.
Onyń aıtýynsha, qazirgi ýaqytta veterınarııalyq qujattamany tsıfrlyq formatqa kóshirý jónindegi baǵdarlamalyq ónim birinshi nusqada ázirlendi jáne mamyr aıynan bastap bir aýdannyń bazasynda testileý rejıminde aprobatsııa bastalady. Testileý nátıjelerin eskere otyryp, túpkilikti pysyqtaýdan keıin baǵdarlama búkil respýblıka boıynsha is júzinde qoldaný úshin usynylatyn bolady.