Veterınarııalyq qujaty joq mal ónimin satqandar qylmystyq jaýapkershilikke tartylýy múmkin
ASTANA. KAZINFORM — Aýyl sharýashylyǵy mınıstrligi veterınarııalyq qujaty joq mal ónimderin satqandardy qylmystyq jaýapqa tartýdy usynyp otyr.
— Jetkizýshiler men veterınarııalyq qujattarsyz ónim satyp alýshylarǵa qatysty jaýapkershilikti qylmystyq jaýapkershilikke deıin qatańdatý qajet. Veterınarııany odan ári transformatsııalaý — tsıfrlandyrýdy jetildirýdi, taýarlar qozǵalysynyń qaýipsizdigi men qadaǵalanýy boıynsha zańnamany jaqsartýdy, júkke veterınarııalyq-sanıtarııalyq baqylaýdy kúsheıtýdi, jergilikti ákimdikterdiń ókiletterin keńeıtýdi, mal syrǵasyn uıymdasqan sharýashylyqtardyń óz betinshe satyp alýy arqyly bıýdjet qarajatyn azaıtýdy kózdeıdi, — dedi mınıstr Aıdarbek Saparov Úkimet otyrysynda.
Onyń aıtýynsha, mınıstrlik eldegi maldyń aınalymyn 7 qosymsha servıs arqyly júıeli túrde baqylap otyr.
— Árbir janýarǵa jeke nómir beriledi. Barlyq derek pen veterınarııalyq rásim tirkeledi. Fermerler men veterınarlar elektrondyq servısterdi paıdalaný arqyly ýaqyt únemdep, qatelik qaýpin azaıtady, — dedi mınıstr Aıdarbek Saparov Úkimet otyrysynda.
Buǵan deıin Qazaqstanda aýyl sharýashylyǵyn tsıfrlandyrý qalaı júrip jatqanyna sholý jasaǵan edik.