Veterınarııa salasynda qandaı ózgerister bolady
Aıta keteıik, búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Veterınarııa salasynda uıymdastyrý, iske asyrý fýnktsııalarynyń negizgi bóligi jáne baqylaý-qadaǵalaý fýnktsııalarynyń bir bóligi jergilikti atqarýshy organǵa bekitilgen. Veterınarııalyq baqylaý jáne qadaǵalaý komıtetinde aýyl sharýashylyǵy ónimin eksporttaý/ımporttaýmen baılanysty, sondaı-aq jergilikti atqarýshy organnyń, memlekettik veterınarııalyq uıymdardyń qyzmetterine baqylaý júrgizý jáne úılestirý fýnktsııasy qaldy. Jergilikti atqarýshy organdarda baqylaý-qadaǵalaý jáne iske asyrý fýnktsııalarynyń bir bóligin shoǵyrlandyrý múddeler qaıshylyǵyna ákeledi, sebebi ákimdik ózi is-sharalardy uıymdastyrady jáne ony ózi baqylaıdy. Sondaı-aq eki qyzmetke (JAO jáne QR AShM Veterınarııalyq baqylaý jáne qadaǵalaý komıteti) baqylaý-qadaǵalaý fýnktsııalaryn shoǵyrlandyrý keıbir jaǵdaılarda veterınarııa salasyndaǵy qyzmetterdi iske asyrý boıynsha jaýapkershilikti anyqtaýda qıynshylyq týdyrady», - dedi mınıstr.
Onyń atap ótýinshe, veterınarııa qyzmetiniń jumys isteý tıimdiligin arttyrý úshin zań jobasynda tıisti qadamdar kózdelgen. Birinshiden, jergilikti atqarýshy organdardan jáne keden organdarynan (avtokólikte baqylaý) baqylaý-qadaǵalaý fýnktsııasyn veterınarııa salasyndaǵy ýákiletti organ vedomstvosyna qaıtarý jolymen barlyq baqylaý-qadaǵalaý fýnktsııasyn bir organǵa shoǵyrlandyrý eskerilgen.
Ekinshiden, jergilikti atqarýshy organdardyń veterınarııalyq qyzmetiniń vertıkaldy baǵynystylyǵyn qurý jolymen olardyń qurylymyn ózgertý, ıaǵnı veterınarııalyq bólimshelerdi aýdandar, oblystyq mańyzy bar qalalar deńgeıinde ókilderi bolý múmkindigimen oblys deńgeıinde shoǵyrlandyrý, sondaı-aq memlekettik veterınarlyq uıymdardy oblystyq deńgeıge baǵynysty etý qarastyrylǵan.
«Joǵaryda kórsetilgen ózgeristerdi qabyldaý kezinde jergilikti atqarýshy organdarda veterınarııa salasyndaǵy iske asyrý fýnktsııasy qalady, ýákiletti organ vedomstvosyna barlyq kezeńdegi baqylaý-qadaǵalaý fýnktsııasy beriledi, sondaı-aq bul jergilikti atqarýshy organdardyń veterınarııalyq qyzmetiniń vertıkalyn qurýǵa múmkindik beredi», - dedi Saparhan Omarov.