Veterınarııa salasy reformalanady: Mınıstrlik jol kartasyn bekitti

NUR-SULTAN. QazAqparat – Elimizde veterınarııa júıesin reformalaýdyń jol kartasy bekitildi. Bul týraly QR Aýyl sharýashylyǵy mınıstriniń orynbasary Rústem Qurmanov málim etti, dep habarlaıdy QazAqparat tilshisi.

«Ótken jyly qyrkúıekte Memleket basshysy halyqqa Joldaýynda veterınarııa júıesin reformalaý boıynsha naqty mindetter qoıdy. Olardy oryndaý úshin veterınarııa júıesine aýdıt jáne taldaý júrgizildi. Sonymen qatar veterınarııa salasyn reformalaý boıynsha sharalar ázirlenip, ol saraptamalyq qoǵamdastyqpen, bıznespen, salalyq qaýymdastyqtarmen jáne quzyrly memlekettik organdarmen birneshe ret talqylandy», - dedi Rústem Qurmanov Ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, veterınarııa júıesin reformalaý jónindegi jol kartasy bekitildi. Ol mynadaı sharalardy qamtıdy:

- veterınar dárigerlerdiń mártebesin anyqtaý;

- veterınarııa salasyn tsıfrlandyrý jáne avtomattandyrý;

- veterınarııa salasy mamandaryn daıarlaý;

- jergilikti jerlerde mal dárigerleriniń jalaqysyn arttyrý;

- veterınarııalyq qyzmetter ókilettikteriniń arajigin ajyratý;

- veterınarııa salasy boıynsha zańnamany halyqaralyq standartqa sáıkestendirý.

«Joǵaryda atalǵan reformalardy kezeń-kezeńmen júzege asyrý josparlanyp otyr. Atalǵan sharalar otandyq veterınarııa qyzmetiniń tıimdiligin arttyrýǵa jáne ony jańa sapaly deńgeıge kóterýge múmkindik beredi», - deıdi mınıstrdiń orynbasary.