Veterınarııa salasyn otandyq vaktsınamen qamtamasyz etý deńgeıi qandaı

ASTANA. KAZINFORM — 2024 jylmen salystyrǵanda mal aýrýlary oshaqtary 51 paıyzǵa tómendegen. Bul týraly Aýyl sharýashylyǵy vıtse-mınıstri Amanǵalı Berdalın málim etti.

— Dúnıejúzilik janýarlar saýlyǵy uıymy janýarlardyń 90-nan astam tizimdik asa qaýipti aýrýlaryn anyqtady, onyń ishinde el aýmaǵynda 23 aýrýǵa qatysty vaktsına egilip jatyr. Jalpy, elimiz boıynsha 2024 jylmen salystyrǵanda mal aýrýlary oshaqtary 51 paıyzǵa tómendegen. Mınıstrlik brýtsellez, usaq kúıis qaıyratyn janýarlardyń obasy, aýsyl jáne basqa da aýrýlarmen kúres strategııasyn jetildirý boıynsha Dúnıejúzilik janýarlar saýlyǵy uıymy, Azyq-túlik jáne aýyl sharýashylyǵy uıymy, Dúnıejúzilik densaýlyq saqtaý uıymy halyqaralyq sarapshylarynyń qatysýymen jumys tobyn qurdy. Onyń qorytyndysy boıynsha sarapshylardyń usynymdaryn eskere otyryp, kúres sharalary qaıta qaralatyn bolady, — dedi A. Berdalın Senatta veterınarııalyq qyzmet taqyrybyn talqylaýǵa arnalǵan Úkimet saǵatynda.

Onyń aıtýynsha, 2024 jyldan bastap Qazaqstanda veterınarııa salasyn otandyq vaktsınalarmen qamtamasyz etý boıynsha sharalar iske asyrylyp jatyr.

— Satyp alý úlesi 34 paıyzdan 78 paıyzǵa deıin ulǵaıdy. Jalpy, 22 vaktsına satyp alynady, onyń 18-i otandyq jáne 4-i ımporttan. Bul shara vaktsınalardy jedel jáne ýaqtyly satyp alýǵa oń áser etedi. Importty odan ári almastyrý úshin otandyq dıagnostıkalyq test-júıelerdiń óndirisin keńeıtý qajet. Bul baǵyttaǵy jumys Qazbıofarm Ulttyq holdıngimen júrgizilip jatyr, — dedi vıtse-mınıstr.

Budan buryn habarlanǵandaı, el aýmaǵynda 9,1 mln bas iri qara mal tirkeldi.