Veterınarııa qyzmetin ákimdikterden mınıstrlik quzyretine qaıtarý usynyldy

NUR-SULTAN. QazAqparat – Mal aýrýynyń órshýinen karantın engizý sheshimin aýyl veterınary ózdigimen qabyldaı alýy tıis. Bul týraly QR Aýyl sharýashylyǵy mınıstriniń orynbasary Rústem Qurmanov aıtty, dep habarlaıdy QazAqparat tilshisi.

«Veterınarııa qyzmeti boıynsha júrgizilgen taldaý nátıjesinde qadaǵalaý jáne iske asyrý fýnktsııalarynyń jetkiliksizdigi aıqyndaldy. Atap aıtqanda, mal arasynda aýrýdyń órshýi anyqtalǵan jaǵdaıda karantın jáne shekteý is-sharalaryn ýaqtyly qoldanbaý. Aýyldyq jerdegi veterınarlar ókilettiginiń bolmaýy. ıAǵnı quqyq buzýshylyq anyqtalsa veterınar ózdiginen eshqandaı shara qabyldaı almaıdy. Sol sııaqty ákimdikterdiń veterınar mamandarǵa olarǵa tán emes fýnktsııalardy júkteý máselesi de bar. Mysaly, qańǵybas ıtterdi aýlaý nemese aýyl sharýashylyǵy janýarlaryn qoldan uryqtandyrý degen sekildi», - dedi Rústem Qurmanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, atalǵan problemany sheshý maqsatynda veterınar mamandardyń ókilettiligin qaıta qaraý jáne sala qyzmetin ákimdikterden Veterınarııalyq baqylaý jáne qadaǵalaý komıtetine berý usynylady.

«Osy oraıda veterınar mamandardyń quzyretin qaıta qaraý ózekti: olarǵa epızootııalyq oshaqtardy zertteýge múmkindik berý, mal arasynda taraıtyn aýrýlarǵa qatysty karantındik sharalar týraly sheshimdi ózdiginen qabyldaı alýy. Sondaı-aq, veterınarlarǵa janýarlardan alynatyn ónim men shıkizatqa veterınarııalyq-sanıtarııalyq saraptamany lıtsenzııalaý quqyǵyn berý de mańyzdy. Odan bólek jeke jáne zańdy tulǵalardan veterınarııa salasyndaǵy kásipkerlik qyzmetti júzege asyrýdy bastaǵany nemese toqtatqany týraly habarlamalardy qabyldaý. Taǵy bir mańyzdy jaıt veterınar mamandardyń moınynan ózine tán emes fýnktsııalardy alyp tastaý kerek», - deıdi ol.

Buǵan deıin elimizde veterınarııa salasyn reformalaýdyń jol kartasy bekitilgeni týraly habarlaǵan edik.

Foto: ortcom.kz