Veterınarııa ǵylymy jasandy ıntellekt kómegimen damýy tıis — Aqylbek Kúrishbaev
ALMATY. KAZINFORM — Qazir veterınarııa ǵylymy jańa syn-qaterlerge beıimdelip, jasandy ıntellekt pen tsıfrlyq tehnologııalardy paıdalaný arqyly damýy tıis.
Bul týraly qazaq veterınarııa ǵylymynyń 120 jyldyǵyna arnalǵan halyqaralyq ǵylymı-praktıkalyq konferentsııa barysynda QR Prezıdenti janyndaǵy Ulttyq ǵylym akademııasynyń prezıdenti Aqylbek Kúrishbaev aıtty.
Aqylbek Kúrishbaevtyń sózinshe, veterınarııa salasyna jasandy ıntellekt pen tsıfrlyq tehnologııalardy engizý dıagnostıka dáldigin arttyryp, áreket etý jyldamdyǵyn joǵarylatady jáne veterınarlyq qyzmetterdiń jumysyn ońtaılandyrady.
— Qazirgi veterınarııa ǵylymy jańa syn-qaterlerge beıimdelip, jasandy ıntellekt pen tsıfrlyq tehnologııalardy paıdalaný arqyly damýy tıis. Transformatsııanyń basty baǵyttary: veterınarlyq qujattamany tsıfrlandyrý — barlyq eseptilikti elektrondyq formatqa kóshirý, bıýrokratııany azaıtý, derekterdi qorǵaý úshin blokcheındi engizý. IoT qurylǵylary avtomattandyrý, baqylaý jáne basqarý salalarynda jańa múmkindikter ashyp jatyr. Sondyqtan epızootııalyq jaǵdaıdy baqylap, aýrýlardyń órshýin boljaý úshin qajet. Dıagnostıka men profılaktıkada jasandy ıntellekti qoldaný kerek, — dedi QR Prezıdenti janyndaǵy Ulttyq ǵylym akademııasynyń prezıdenti Aqylbek Kúrishbaev.
Spıker elimizdiń barlyq oblysynda mal sharýashylyǵyn veterınarlyq qamtamasyz etý jáne epızootııalyq ahýal máselesi bar ekenin atap ótti.
— Veterınarııa ınstıtýty jergilikti ǵylymı uıymdar men oblystyq veterınarııalyq mekemelerge qajetti ádistemelik jáne praktıkalyq kómek kórsete otyryp, bul máseleni sheshýge barynsha belsendi qatysýy kerek dep esepteımin, — dedi ol.
Aıta keteıik, konferentsııaǵa Reseı, Qytaı, Ońtústik Koreıa, Eýropa, Belarýs, Grýzııa, Tájikstan elderiniń jetekshi ǵylymı uıymdardyń ǵalymdary men mamandary qatysyp jatyr.
Osyǵan deıin Májiliste jasandy ıntellekt kómegimen jasalǵan týyndyny «JI» tańbasymen jarııalaý máselesi pysyqtalyp jatqany týraly jazǵan edik.