Veterınar mamandar daıyndaýǵa memlekettik bilim granttaryn keminde 2 ese kóbeıtý kerek - ǵalym pikiri
ASTANA. 20 sáýir. QazAqparat - Veterınar mamandar daıyndaýǵa memlekettik bilim granttaryn keminde 2 ese kóbeıtý kerek.
Bul týraly búgin elordada «Qazaqstan Respýbılkasyndaǵy veterınarııanyń jaǵdaıy jáne damý perspektıvasy» taqyrybynda ótken halyqaralyq konferentsııada S.Seıfýllın atyndaǵy Qazaq agrotehnıkalyq ýnıversıteti veterınarııa jáne mal sharýashylyǵy tehnologııasy fakýltetiniń dekany Balǵabaı Maıqanov aıtty.
Ǵalymnyń paıymynsha, elimizde veterınar mamandaryn daıyndaý barysyna erekshe kóńil bólýimiz kerek. Buǵan osy mamandyqqa memlekettik tapsyrysty arttyrý, qus sharýashylyǵy, ara sharýashylyǵy, ıhtıologııa jáne veterınarııanyń qysqa baǵyttaryn ashý arqyly oqyp jatqan stýdentterdiń mamandyqtaryn tereńdete oqýyna jaǵdaı jasaý jatady.
«Veterınar mamandar naǵyz jetispeıtin kezde osy mamandyqqa bólingen memlekettik granttar sany 606 ǵana. Osy mamandarǵa suranys artýy úshin memlekettik grantty kem degende 2 esege kóbeıtý kerek», - dedi ol.
