Versace sán úıi Prada quramyna endi: 1,3 mlrd eýroǵa kelisim jasaldy

ASTANA. KAZINFORM — Italıandyq Prada sándi brendi Capri Holdings Limited holdınginen Versace sán úıin 1,375 mlrd dollarǵa satyp alý mámilesin aıaqtady, dep habarlaıdy Kazinform agenttigi.

Capri Holdings lıýksti sán segmentindegi holdıngtik kompanııa Versace sán úıin satýdan túsken qarajatty qaryzdyq mindettemeleriniń kóp bóligin jabýǵa jumsaıdy.

Top Michael Kors jáne Jimmy Choo brendterine menshik quqyǵyn saqtap qalady, kompanııa halyqaralyq lıýks klasyndaǵy taýarlar óndirýshisi jáne rıteıleri retinde jumysyn jalǵastyrady.

Capri Holdings bas dırektory Djon Aıdol atap ótkendeı, bul mámile holdıngtiń qarjylyq jaǵdaıyn aıtarlyqtaı nyǵaıtyp, kompanııaǵa bolashaq ınvestıtsııalar men aktsıonerlerge tólem jasaý úshin úlken ıkemdilikti qamtamasyz etedi.

— Biz Michael Kors jáne Jimmy Choo tanymal brendterimizdiń áleýetin barynsha arttyrý úshin strategııalyq bastamalarymyzdy júzege asyrýǵa áli de nazar aýdaryp otyrmyz. Bolashaqqa kóz júgirtsek, biz bıylǵy jyly bıznesimizdi turaqtandyrý jáne 2027 qarjy jylynda ósimdi jańartý úshin berik negiz qalaý jolynda ekenimizge senimdimiz, — dep habarlady Aıdol.

Ol sondaı-aq Versace komandasy — kreatıvti dırektor Darıo Vıtale men sán úıiniń bas dırektory Emmanýel Gıntsbýrgerge alǵysyn bildirip, sondaı-aq brendti 1997 jyldan 2025 jylǵa deıin basqarǵan Donatella Versacheniń úlesin erekshe atap ótti.

Aıdoldyń aıtýynsha, Prada — sán úıiniń úzdiksiz damýy úshin «minsiz seriktes».

Bul mámile eýropalyq retteýshilerdiń iri sán úılerin muqııat tekserýiniń kúsheıýi tusynda jasalyp otyr.

Qazan aıynda Eýrokomıssııa Gucci, Chloé jáne Loewe brendterine 157 mln eýro aıyppul saldy. Úsh lıýks brendi Eýroodaqtyń monopolııaǵa qarsy erejelerin jyldar boıy buzǵany úshin aıyptaldy.

Materıaldyń aǵylshyn tilindegi túpnusqasyn myna silteme arqyly ótip oqı alasyz.

Buǵan deıin Prada kompanııasy Versace sán úıin satyp alatynyn jazǵan bolatynbyz. 30 qyrkúıekte Eýrokomıssııa 1,24 mıllıard eýrolyq kelisimdi maquldady.