Verona sahnasyn baǵyndyrǵan ártister Astanada «Súıikti operalardy» oryndaıdy
ASTANA. 16 jeltoqsan. QazAqparat - 21 jeltoqsanda «Astana Opera» teatrynyń kameralyq zalynda, «Astana Opera usynady» abonementiniń aıasynda «Súıikti operalar» atty kontsert ótedi.
Kontsert «Astana Opera» teatrynyń úzdik solısteri, Veronada ótken Halyqaralyq konkýrstyń laýreattary: Medet Shotabaev, Súndet Baıǵojın, Álfııa Kárimovanyń qatysýymen bolady. Sondaı-aq kontsertte «Astana Opera» teatrynyń jaryq juldyzdary: Jannat Baqtaı, Talǵat Musabaev, Dına Hamzına, Margarıta Dvoretskaıa, Gúlzat Dáýirbaeva, Talǵat Galeev, Galına Cheplakova, Eskendir Ábjanov, jáne basqalary óz ónerlerin pash etpek.
«Astana Opera» teatry operalyq trýppasynyń kórkemdik jetekshisi, Tatarstan Respýblıkasynyń eńbek sińirgen óner qaıratkeri Gıýzel Haıbýlına, kontserttiń ózegi - jeńimpazdarymyz Italııadaǵy konkýrsta shyrqaǵan D. Pýchchını operasynan «Bogema» jáne G. Donıtsettıdiń «Marııa Stıýart» arııalary men kórinisteri bolatynyn atap ótti. «Álfııa Kárimovanyń «Marııa Stıýart» operasyndaǵy Marııa Stıýart partııasyn Qazaqstanda oryndaıtyn jalǵyz ánshi ekenin aıta keteıin», - deıdi Haıbýlına G.
«Kontsertte sonymen qatar teatrdyń sımfonııalyq orkestriniń úzdik solısteri - úrmeli aspaptar bestigi jáne ishekti aspaptar kvınteti óner kórsetedi. Olar áıgili Dj. Verdıdiń «Travıata» jáne J. Bızeniń «Karmen» operalarynyń orkestrmen oryndalatyn úzindilerin oınaıdy», - dep jalǵastyrdy Gıýzel Haıbýlına.
Keshte Astanada sırek oryndalatyn operalardan úzindiler shyrqalady, olar: M. Mýsorgskııdiń «Borıs Godýnov», P. Chaıkovskııdiń «Pıkovaıa dama», L. Bernstaınniń «Kandıd» jáne basqalary. Sondaı-aq kontsertte óner jaıly áńgime qozǵaıtyn B. Pasternaktiń óleńderi jyrlanady. Atalǵan kórinistiń ıdeıasynda tyńdarmanǵa shyǵarmashylyqtyń atmosferasyn jetkizý jatyr. D. Pýchchınıdiń «Bogema» operasy shyǵarýshyǵa, shyǵarmashylyq adamyna arnalǵan, onda aqyn Rýdolf, sýretshi Marsel, fılosof Kolen jáne mýzykant Shonar usynylady.
Kontsert bir bólimnen turady, bastalýy 19:00-de.
