Verıfıkatsııadan ótpegen telefon úshin kim jaýap beredi
ASTANA. KAZINFORM — Byltyr elimizde 27 myńnan astam, al bıylǵy alǵashqy jartyjyldyqta 5 300 ınternet-alaıaqtyq tirkelip, azamattarǵa mıllıardtaǵan teńge shyǵyn keldi. Osyǵan baılanysty 20 tamyzdan bastap smartfondardy satý tártibine jańa ózgeris engiziledi. Bul týraly Saýda jáne ıntegratsııa mınıstrligi Astana qalasy boıynsha Saýda jáne tutynýshylardyń quqyqtaryn qorǵaý departamentiniń basshysy Erkebulan Taǵashov Jibek Joly telearnasynyń «Búgin Live» baǵdarlamasynda aıtty.
— Budan bylaı satýshy IMEI-kodty satyp alýshyǵa tólem jasalǵanǵa deıin kórsetýge mindetti bolady. Bul ózgerister zańsyz ákelingen qurylǵylardyń aınalymyn azaıtyp, azamattardy alaıaqtardan qorǵaýǵa baǵyttalǵan, — dedi spıker.
Mamannyń sózinshe, bul ózgerister tutynýshylardyń jıi kóteretin máselesiniń birin sheshýge baǵyttalyp otyr.
— Buǵan deıin azamattar verıfıkatsııadan ótpegen smartfon satyp alyp, keıin onyń zańdastyrylmaǵanyn bilgen jaǵdaı kóp bolatyn. Keıde sot organdary bul jaýapkershilikti tutynýshynyń ózine júkteıtin. Endi olaı bolmaıdy. Eger tutynýshynyń quqyǵy buzylsa, ol bizdiń departamentke júgine alady, — dedi Erkebulan Taǵashov.
Zańnamadaǵy ózgeristerge sáıkes, verıfıkatsııadan ótpegen telefon endi tıisti emes sapadaǵy taýar retinde tanylady. Sondyqtan satyp alýshy mundaı qurylǵyny aýystyrýdy, kemshiligin joıýdy, shyǵynyn óteýdi nemese satyp alý-satý shartyn buzyp, aqshasyn qaıtarýdy talap ete alady. Bul quqyqtar «Tutynýshylardyń quqyqtaryn qorǵaý týraly» zańnyń 15-babynda kózdelgen.
Tıisti ózgerister «Saýda qyzmetin retteý týraly» zańǵa engizildi.
Aıta keteıik, jyl basynan beri departamentke túsken ótinishter boıynsha tutynýshylarǵa 306 mıllıon teńgeden astam qarajat qaıtarylǵan.
Sonymen qatar elde uıaly telefondardy satýdyń jańa tártibi engizilgeni týraly jazǵan edik.
